SMALI er næsta mót liðakeppninnar, mótið verður haldið laugardaginn 22. febrúar nk og hefst kl. 14.00. Ekki verður keppt í skeiði fyrr en á lokamótinu þetta árið þar sem brautin okkar er ekki tilbúin. Sameiginleg æfing allra liða verður á miðvikudagskvöldið nk frá kl. 19.30, Þytur ætlar að bjóða upp á súpu og brauð fyrir alla sem mæta á æfinguna og hvetjum við aðra félaga til að mæta upp í höll og fá sér súpu og eiga skemmtilegt kvöld saman.

Skráning er á netfang thytur1@gmail.com fyrir miðnætti fimmtudagskvöldsins 20. febrúar. Fram þarf að koma nafn og kennitala knapa, flokkur, hestur, IS númer, litur, aldur og hvaða liði keppandinn er. Skráningargjöld eru 1.500 kr í smala fyrir fullorðna en 1.000 fyrir unglinga. Greiða þarf skráningargjöld áður en mót hefst inná reikning Þyts 0159-15-200343 kt. 550180-0499.

Keppt verður í unglingaflokki (fædd 1997 og seinna), 3. flokki, 2. flokki og 1. flokki og fara 9 hestar brautina aftur ef 16 eða fleiri keppendur eru í flokki, annars fara 5 í úrslit.

Stigin í smala inn í liðakeppnina í forkeppni eru þannig að 300 stig gefa 6 stig, 290 - 299 stig gefa 5,8 stig, 280 - 289 stig gefa 5,6 stig, 270 - 279 stig gefa 5,4 stig osfrv.
Úrslitin eru eins á öllum mótunum þeas 1 sæti = 10 stig, 2 sæti = 8 stig, 3 sæti = 6 stig, 4 sæti = 4 stig, 5 sæti = 2 stig, 6 sæti = 2 stig (ef B-úrslit), 7-10 = 1 stig

Einstaklingskeppni:
1.sæti - 10 stig
2.sæti - 8 stig
3.sæti - 7 stig
4.sæti - 6 stig
5.sæti - 5 stig
6.sæti - 4 stig
7.sæti - 3 stig
8.sæti - 2 stig
9.sæti - 1 stig


Smalinn:

Reglur smalans:

Smalinn dregur nafn sitt af einu mikilvægasta hlutverki íslenska hestsins frá örófi alda. Eiginleikar sem prýða góðan smala og smalahest eru nauðsynlegir ef árangur á að nást, þetta eru þættir eins og hraði, kjarkur, fimi og snerpa.

Riðin er braut sem mörkuð er keilum sem ná upp á síður hests. Keilurnar skulu vera þannig útbúnar að þær falli við litla snertingu. Árangurinn ræðst af brautartíma og felldum keilum. Reiknireglur eru þær sömu og í tímabraut torfærunnar. Smalinn er hrein grein í þeirri merkingu að árangurinn er mælanlegur án frávika, þ.e. hann ræðst eingöngu af tíma og felldum keilum en ekki mati dómara. Dómarar eru engu að síður til staðar og meta hvort knapinn fari gegnum öll hlið, telja felldar keilur og hafa eftirlit með reiðmennsku knapa líkt og í öðrum keppnisgreinum.

Stigin telja þannig að knapar raðast í sæti eftir besta tímanum, sá sem er fyrstur fær 300 stig, sá næsti 280, 270 o.s.frv. Við hverja fellda keilu dragast frá 14 stig. Fyrir sleppt hlið eru 28 refsistig. Yfir brúnna er ekki leyft að fara á stökki þ.e.a.s allur annar gangur er í lagi. Ef brúnni er sleppt þá er það 4x28 refsistig Gult spjald= gróf reiðmennska 30 refsistig Rautt spjald= MJÖG gróf reiðmennska ÚR LEIK!

Brautin verður svipuð og undanfarin ár með 4 meginbreytingum, gamla brautin er spegluð, í staðin fyrir L-ið er komið U, síðan er brokkspíra í staðin fyrir eitt hlið sem er í framhaldi af U-inu og í byrjun brautar þarf að opna hlið. Við síðustu tunnu sem er í horninu fyrir lokaferðina, þar verður veifa ofan á tunnunni sem knapar þurfa að ná og taka með sér í mark eins og var í fyrra. Unglingar þurfa ekki að opna hlið.
 

Ein tilkynning fyrir næsta mót sem er fimmgangur og tölt T7 í 3 flokki og tölt T3 í unglingaflokki að þá mega knapar keppa í þessum töltgreinum á hesti sem annar knapi keppir síðan á, á lokamótinu. Þetta var samþykkt á fundi um liðakeppnina sem haldinn var fyrir keppnina í ár. Því er það þessi regla og fótaskoðun sem ekki er farið eftir reglum LH vegna mótahalds.

Aðgangseyrir 500 kr