Færslur: 2014 Nóvember

30.11.2014 17:02

Námskeið í janúar

 
 

Upphaf þjálfunar 9.-10. Janúar 2015

 

Námskeið þar sem farið verður  yfir nokkrar liðkunar- og styrktaræfingar sem notaðar eru til þess að bæta hestinn.  

Markmið er einnig að bæta samskipti knapa og hests og fá góðar hugmyndir fyrir vetrarþjálfunina.   

  • Staðsetning: Reiðhöllin á Hvammstanga

     

  • Sýnikennsla og spjall föstudagskvöldið kl. 20:00
  • Laugardagur: byrjar kl. 09:30. Hóptími, 3-4 saman fyrir hádegi í 50 mín. (fer eftir fjölda á námskeiði).
  • Einkatími 30 mín, byrjar kl. 13:00
  • Verð: 10.000 kr. á mann
  • Kennari: Fanney Dögg Indriðadóttir reiðkennari.
  • skráning á thytur1@gmail.com - Hámarksfjöldi er 10 manns

 

Gangsetning og þjálfun ungra hrossa 23.-24. janúar 2015

Námskeið fyrir knapa með reiðfær hross sem þurfa hugmyndir og hjálp með áframhaldandi þjálfun og til að bæta gangtegundir og þjálni reiðhestsins.

  • Staðsetning: Reiðhöllin á Hvammstanga
  • Sýnikennsla og spjall föstudagskvöldið kl. 20:00
  • Laugardagur: byrjar kl. 09:30. Hóptími, 3-4 saman fyrir hádegi í 50 mín. (fer eftir fjölda á námskeiði).
  • Einkatími 30 mín, byrjar kl. 13:00
  • Verð: 10.000 kr. á mann
  • Kennari: Fanney Dögg Indriðadóttir reiðkennari.
  • skráning á thytur1@gmail.com - Hámarksfjöldi er 10 manns

26.11.2014 19:42

Nýliðun


Kæru félagar. 

Á síðasta fundi hestamannafélagsins sem haldin var 19. nóvember sl í félagshúsi Þyts kom upp mikil og góð umræða hvernig auka ætti nýliðun í greininni. Þetta er ekki nýtt vandamál né staðbundið og verðum við því að vera vakandi og opin fyrir öllum hugmyndum. Ein hugmyndin sem kom á þessum fundi er að félagsmenn myndu "taka í fóstur hestabarn" þ.e.a.s. að eigandi hests myndi veita aðgang að hrossi, aðstöðu og aðstoð þeim börnum og unglingum sem hafa áhuga en vantar tækifærið til að ríða út. 

Við leitum því til félagsmanna, átt þú hestamaður góður, þægan og traustan hest sem er tilbúinn í nýtt hlutverk og ala upp ungan knapa? 

Þytur myndi aðeins vera tengiliður og milligönguaðili, strax á fundinum voru 2 félagsmenn sem sögðu líklegt að þau gætu boðið uppá þetta. Fyrirkomulagið mætti svo ræða bara í hverju tilviki fyrir sig t.d. gætu kannski 2-3 krakkar skipt með sér einum hesti því ekki er víst að allir séu tilbúnir að binda sig daglega yfir þessu svona til að byrja með. Ef þú heldur að þú getir "taka í fóstur hestabarn" skaltu endilega hafa samband við Kollu á netfangið kolbrunindrida@gmail.com eða í síma 863-7786.

Foreldrar barna sem langar að stunda hestamennsku en hafa ekki aðgang að hesti mega einnig endilega hafa samband við Kollu eða einhvern í stjórn Þyts.

stjórnin


25.11.2014 09:51

Skýrsla æskulýðsnefndar 2013 - 2014

 

Æskulýðsstarf

Hestamannafélagsins Þyts

                                                             

Starfsskýrsla 2013-2014.

 

 

Æskulýðsnefnd Þyts 2013-2014.

Guðný Helga Björnsdóttir, formaður

Helga Rós Níelsdóttir

Irena Kamp

Þóranna Másdóttir

Þórdís Helga Benediktsdóttir, tengiliður við stjórn

 

Uppskeruhátíð.

Í lok október 2013 var haldin uppskeruhátíð barna og unglinga á Sveitasetrinu Gauksmýri.  Að venju var vel mætt af unglingum, börnum og foreldrum þeirra.  Hestamannafélagið bauð upp á kaffi að hætti Gauksmýrarverta. Á hátíðinni voru veittar viðurkenningar fyrir knapa ársins í unglinga- og barnaflokki. Karitas Aradóttir var knapi ársins í barnaflokki og Kristófer Smári Gunnarsson í unglingaflokki. Öll börn sem tekið höfðu á einhvern hátt þátt í vetrarstarfinu fengu gjafir frá Æskulýðsnefndinni.  Formaður fór yfir starf liðins árs og það sem væri á döfinni á komandi ári. Æskulýðsnefndin þakkaði að lokum iðkendum kærlega fyrir samstarfið og foreldrum og aðstandendum sérstaklega fyrir frábæra þátttöku og viðtökur við hverskonar beiðni um aðstoð.

Þrettándagleði.

Æskulýðsnefndin stóð að venju fyrir Þrettándagleði í sveitarfélaginu. Vegna veðurs var ekki farin hópreið um Hvammstanga, heldur fór gleðin öll fram inni í reiðhöllinni Þytsheimum á Hvammstanga. Þar mættu álfakóngur og -drottning, ásamt álfameyjum, Grýlu, Leppalúða og nokkrum jólasveinum.  Allt voru það krakkar úr æskulýðsstarfi félagsins sem tóku hlutverkin að sér.  Í Þytsheimum var öllum gefið kakó, kaffi og kökur sem foreldrar og aðstandendur í æskulýðsstarfinu höfðu framreitt. Þar voru gengnir nokkrir hringir á eftir álfahirðinni, farið í leiki og teymt undir börnum. Þessi skemmtun tókst mjög vel þrátt fyrir leiðindaveður, og stóðu krakkarnir sig vel að vanda.

Fundir.

Nokkrir fundir voru haldnir á starfsárinu, bæði foreldrafundir um starfið og nefndarfundir.

Reiðþjálfun og fimleikar á hesti (voltigieren).

Mikill áhugi var á reiðþjálfun og fimleikum á hesti. Um 60 börn á öllum aldri tóku þátt í reiðþjálfun, fimleikum á hesti, reiðsýningu, keppni og Knapamerki í vetur. 2 unglingar luku prófi í Knapamerki 1 og 6 luku prófi í Knapamerki 3. Fanney Dögg Indriðadóttir sá um reiðkennsluna og Knapamerkin. Irina Kamp og Kathrin Schmitt sáu um fimleika á hesti.  Þátttakan í reiðþjálfuninni var það mikil að hóparnir voru sex, mislangt komnir krakkar í þeim og fengu þjálfun við hæfi hvers hóps. Svo vorum við með þjálfun fyrir allra yngstu knapana, um hana sáu krakkarnir í Knapamerki 3. Sú þjálfun var á laugardögum og komu foreldrarnir með, því það þurfti að hjálpa sumum knöpunum, sem ekki voru háir í loftinu.

Mjög mikil þátttaka var í námskeiðinu fimleikar á hesti. Það eykur mjög jafnvægi krakkanna að taka þátt í æfingum sem þessum, einnig er það mjög gott fyrir þau sem hafa ekki aðgang að hestum að geta verið á þessum námskeiðum og eflir þetta mjög áhuga þeirra á hestamennskunni. Í fimleikum á hesti var byrjendahópur og svo hópur fyrir lengra komna. Bæði var kennt í íþróttahúsinu á fimleikahestum og í reiðhöllinni á alvöruhestum.

Á haustin fara hestafimleikarnir allir fram í íþróttahúsinu á Laugarbakka. Þar var verið að æfa krakkana í grundavallaratriðum fimleika og undirbúa þau undir að gera æfingar á lifandi hesti.

 

Grunnskólamótin.

Æskulýðsnefndir hestamannafélaganna á Norðurlandi vestra halda þrjú mót yfir veturinn, sem þau kalla Grunnskólamót. Þá keppa krakkarnir fyrir þann skóla sem þau eru í og safna stigum. Mótin voru haldin í Arnargerði á Blönduósi, í Svaðastöðum á Sauðárkróki og í Þytsheimum hér á Hvammstanga. Góð þátttaka var í þessum mótum. Þau eru byggð upp á því að allir geti tekið þátt og æft sig í að keppa. Keppt er í þremur aldursflokkum. Elsti hópurinn 8. - 10. bekkur keppa í tölti, fjórgangi, smala og skeiði. 4.-7. bekkur keppa í smala, tölti, og tví- eða þrígangi. Í tvígangi sýna þau fet og tölt eða brokk, í þrígangi sýna þau fet, tölt og brokk. Ekki þurfa þessi aldursflokkar að sýna stökk, enda getur það verið erfitt fyrir lítið reynda knapa inni í reiðhöllunum. Yngsti aldursflokkurinn í 1. - 3. bekk keppa í þrautabraut og fegurðarreið. Þetta árið var vont veður þegar smalakeppnin fór fram á Blönduósi þannig að Skagfirðingarnir komu ekki til keppni þá.

Sýningar.

Hestamannafélagið stóð þann 29. mars fyrir reiðhallarsýningu sem hét Hestar fyrir alla. Þar tóku krakkar úr æskulýðsstarfinu virkan þátt. Kappkostað var að á sýningunni væri hægt að sjá sem fjölbreyttasta nýtingu á hestinum, frá þægum fjölskylduhesti yfir í stólpa keppnishest og allt þar á milli. Börn og unglingar úr æskulýðsstarfinu voru með opnunaratriðið og mörg atriði úr æskulýðsstarfinu voru inn á milli atriða fullorðna fólksins. Fullt af myndum má sjá af sýningunni á þessum slóðum: http://thytur.123.is/photoalbums/259344/

http://thytur.123.is/photoalbums/259259/

Hestafimleikahópurinn fór á vorsýningu Sleipnis á Selfossi og sýndu atriði. Það var mjög skemmtileg sýning og skemmtileg ferð. Jafnframt því að æfa fyrir sýninguna og taka þátt í sýningunni var ýmislegt skemmtilegt gert í ferðinni, t.d. farið í reiðtúr á hestaleigu í nágrenni Selfoss.

Sumarið.

Krakkarnir og unglingarnir voru dugleg og að taka þátt í ýmsum keppnum í sumar bæði í heimahéraði og nálægum héruðum.  Þó eru þau ekki eins mörg sem taka þátt í keppnum yfir sumarið eins og í reiðhallarmótunum á veturna. Þeim börnum og unglingum sem komust á Landsmótið stóð til boða að fá leiðbeiningar og aðstoð frá Fanneyju Dögg Indriðadóttur. Flottir fulltrúar frá okkar félagi mættu svo galvaskir á Landsmótið og stóðu sig mjög vel í keppni þrátt fyrir úrhellis rigningu og rok. Þau voru einnig fulltrúar Þyts í hópreiðinni og stóðu sig með stakri prýði þar eins og ávalt.

Við í æskulýðsnefnd Þyts erum mjög ánægð með árið hjá okkur. Foreldrar hafa verið mjög duglegir eins og áður að aðstoða við það sem þarf, enda gengi ekki svona starf nema með virkum foreldrum því margir eiga um langan veg að fara til að mæta á námskeið, æfingar eða keppni allan veturinn, einnig þurfa yngstu þátttakendurnir digga aðstoð við að komast upp í hesthús og leggja á.  Vonum við að starfið haldi áfram að blómstra eins og verið hefur undanfarin ár.

Mikið af myndum er hægt að sjá úr starfinu í myndaalbúmi á heimasíðu Þyts: thytur.123.is.

Kær kveðja

Æskulýðsnefnd Þyts.

20.11.2014 08:15

Punktar úr fundargerð

Almennur félagsfundur var haldinn í gærkvöldi, 19.nóv í félagshúsi Þyts. Mæting ágæt en góðar umræður sköpuðust.

Punktar úr fundargerð:
  • Kolla kynnti hugmynd stjórnar um stækkun á hringvelli þeas bæta við hann þannig að það sé einnig 300 m völlur. Komu góðar umræður í kjölfarið, er þetta nauðsyn? hvað er hagkvæmast að gera? Komu fram hugmyndir um að gera frekar upphitunarvöll en að stækka hringvöllinn. Stjórn fundar um þetta, etv sniðugt að koma með tillögu á aðalfund.
  • Einnig hugmynd stjórnar að laga svæðið austan við völlinn, taka dómhúsin og slétta svæðið svo auðveldara sé að slá.
  • Fyrirhugaðar breytingar á dagssetningum móta næsta sumar þeas fyrst verður íþróttamót 13. og 14. júní og gæðingamót 15. og 16. ágúst.
  • Kolla fór aðeins yfir Húnvetnsku liðakeppnina, farið yfir dagsetningar hennar. 14. febrúar verður Smali, 27. febrúar fjórgangur, 20. mars fimmgangur og tölt í 3. fl og yngri flokkunum, 17. apríl tölt og skeið. Breyting frá því sem verið hefur er að börn og pollar fá að koma inn í mótið. Tilkynnt að liðin verða lögð niður og skrá þarf öll lið til leiks fyrir lokaskráningardag fyrsta móts. 
  • Kolla sagði frá því að sýningin verður ekki í ár, ákveðið að hafa sýninguna annað hvert ár.
  • Stefnt að ferð í Borgafjörðinn, tímasetningin ekki komin á hreint en verður auglýst mjög fljótlega. Tillaga var að fara á sýningu vestlendinga en kom fram athugasemd að þá hefði fólk etv ekki tíma til að taka á móti gestum vegna undirbúnings fyrir sýningu. Stjórn heyrir í Borgfirðingum með þetta og setur inn auglýsingu. 
  • Eva sagði frá námskeiðum vetrarins, frumtamningarnámskeið í janúar. Nefndin að skoða fræðslur og áframhaldandi námskeið af frumtamningarnámskeiði.
  • Dagatal laust til umsóknar, ef einhver hefur áhuga á að vinna að því endilega hafið samband við Vigdísi í síma 8951146
  • Firmakeppnin, spurning að breyta sniðinu á henni, kom hugmynd að sameina þorrablótið sem við höfum haldið seinnipartinn í janúar og firmakeppnina. Verður skoðað og auglýst.
  • Kolla sagði frá dagssetningum Grunnskólamótanna. 15 feb á Blönduósi, 15. mars á Sauðárkróki og 12. apríl á Hvammstanga.
  • Aðrar umræður á fundinum, kom upp sú umræða hvernig auka ætti nýliðun í greininni. Þetta er ekki nýtt vandamál né staðbundið og verðum við því að vera vakandi og opin fyrir öllum hugmyndum. Ein hugmyndin sem kom á þessum fundi er að félagsmenn myndu "ættleiða hestabarn" þ.e.a.s. að við myndum veita aðgang að hrossi og veita aðstöðu og aðstoð þeim börnum og unglingum sem hafa áhuga en vantar tækifærið til að ríða út. Stjórn Þyts er farin að skoða þessi mál og voru strax tveir á fundinum sem sögðust til í að skoða þetta fyrirkomulag. Þytur yrði þá etv einhversskonar milligönguaðili.

19.11.2014 21:05

Námskeið veturinn 2015

Nú erum við að skipuleggja vorönnina og þurfum við því að vita hvaða börn vilja fara á reiðnámskeið. Sumir hafa nú þegar skráð sig, þegar uppskeruhátíðin var haldin, en óskum við eftir að þeir sem ekki eru búnir að því skrái sig fyrir 5. desember nk. á netfangið thyturaeska@gmail.com. Nánari upplýsingar má fá þar eða hjá Helgu Rós í síma 848-7219.

Þau reiðnámskeið sem við viljum bjóða upp á eru;

-yngsti hópurinn (kennt aðra hverja helgi og foreldrar eða einhver fullorðinn þarf að vera með hverju barni og hesti)

-reiðnámskeið

-keppnisþjálfun

-knapamerki

-TREC

Ef lítil skráning er í einhverja hópana gæti þurft að fella það námskeið niður.

TREC:

TREC er vaxandi grein hér á landi enda fellur hún vel að okkar hestamennsku og íslenska hestinum. Greinin er hestvæn og styrkir samspil hests og knapa en er allt í senn spennandi, skemmtileg, fjölbreytt og fræðandi. Áherslan verður á ásetu og stjórnun þar sem markmiðið er að komast í gegnum TREC braut eða keppa í greininni og er reiknað með að kennt verði á hálfsmánaðar fresti. Hér meðfylgjandi er myndband frá Hestamannafélaginu Funa, https://www.youtube.com/watch?v=pJMyL4fwdNs#t=29

 

 

Þeir sem hafa áhuga á að fara á Æskan og hesturinn sem halda á í byrjun maí 2015 á Sauðárkróki endilega skráið sig og ef þið eruð með hugmyndir að atriði þá koma þeim á framfæri.

 

Komnar eru dagsetningar fyrir Vinamót hestamannafélaganna Norðurlandi vestra (sem áður hét Grunnskólamót), birt með fyrirvara um breytingar;

15. febrúar - Blönduós

15. mars  - Sauðárkrókur

12. apríl - Hvammstangi

Mótin verða haldin með sama sniði á áður.



--

Kveðja
Æskulýðsnefnd Þyts

 

17.11.2014 13:15

Almennur félagsfundur

Almennur félagsfundur verður haldinn í félagshúsi Þyts, miðvikudaginn 19. nóvember og hefst kl. 20.30


Dagskrá fundarins er:

1. vetrarstarfið

 2. önnur mál

Stjórn Þyts

02.11.2014 18:21

Uppskeruhátíð hrossaræktarsamtakanna í V-Hún og hestamannafélagsins Þyts

Uppskeruhátíð Hrossaræktarsamtaka Vestur-Húnavatnssýslu og Hestamannafélagsins Þyts var haldin laugardagskvöldið 1. nóv sl. Knapi ársins í 1. flokki er Ísólfur L Þórisson og ræktunarbú ársins er Lækjamót.


3 efstu knapar í hverjum flokki fengu viðurkenningu.

1. flokkur

1 sæti Ísólfur L Þórisson
2 sæti Tryggvi Björnsson
3 sæti Fanney Dögg Indriðadóttir

2. flokkur

1 sæti Jónína Lilja Pálmadóttir
2 sæti Stella Guðrún Ellertsdóttir
3 sæti Sigrún Eva Þórisdóttir

Ungmennaflokkur

1 sæti Helga Rún Jóhannsdóttir
2 sæti Kristófer Smári Gunnarsson
3 sæti Birna Olivia Agnarsdóttir


Ræktunarbú ársins er eins og áður segir Lækjamót en það munaði aðeins einu stigi á því og búinu sem var í 2.sæti sem var Grafarkot. Syðri-Reykir voru í 3.sæti.

Hæst dæmdi stóðhesturinn og hæst dæmda hryssan voru Karmen frá Grafarkoti og Askur frá Syðri-Reykjum

Karmen frá Grafarkoti er undan Álfi frá Selfossi og Klassík frá Grafarkoti. Ræktendur eru Herdís Einarsdóttir og Indriði Karlsson og eigandi er Sigurður Örn Ágústsson. Kostir: 8,32 Sköpulag: 8,09 Aðaleinkunn: 8,23

Askur frá Syðri-Reykjum er undan Akk frá Brautarholti og Nös frá Syðri-Reykjum. Ræktandi er Helga Una Björnsdóttir og eigandi er Haukur Baldvinsson

Kostir: 8,59 Sköpulag: 8,13 Aðaleinkunn: 8,41

 

 
 

 

 


Verðlaunuð voru 3 efstu hross í hverjum flokk:

4 vetra hryssur
Vík frá Lækjamóti a.e. 8,08
Ósvör frá Lækjamóti a.e. 7,92
Sóldögg frá Áslandi a.e. 7,81

5 vetra hryssur
Vitrun frá Grafarkoti a.e. 7,95
Hellen frá Bessastöðum a.e. 7,90
Áróra frá Grafarkoti a.e. 7,85

5 vetra stóðhestar
Brimnir frá Efri-Fitjum a.e. 8,35
Karri frá Gauksmýri a.e. 8,15

6 vetra hryssur
Vinátta frá Grafarkoti a.e. 8,02
Birta frá Áslandi a.e. 7,97
Snælda frá Miðhópi a.e. 7,89

Stóðhestar 6 vetra
Askur frá Syðri-Reykjum a.e. 8,41

7 og eldri vetra hryssur
Karmen frá Grafarkoti a.e. 8,23
Sigurrós frá Lækjamóti a.e. 8,17
Ára frá Syðri-Reykjum a.e. 8,14

Stóðhestar 7 vetra og eldri
Safír frá Efri-Þverá a.e. 8,17
Hrammur frá Efra-Núpi a.e. 8,12


Skemmtinefndin fór á kostum eins og vanalega og Þórhallur Sverrisson sá um matinn þetta árið. 



01.11.2014 15:55

Uppskeruhátíð Æskulýðsnefndar Þyts

 

Í dag var á Sveitasetrinu Gauksmýri haldin uppskeruhátíð æskulýðsstarfsins hjá Þyti. Mörg af börnunum og unglingunum sem tóku þátt í starfinu síðastliðið starfsár mættu til að taka á móti viðurkenningum fyrir þátttökuna og fá veitingar að hætti Gauksmýrarverta.

Um 60 börn og unglingar tóku þátt í starfinu síðasta starfsár. Starfið var mjög fjölbreytt: hestafimleikar, reiðnámskeið, Knapamerki 1 og 3, reiðhallarsýning og ýmis mót sem þau tóku þátt í.

Allir krakkarnir fengu viðurkenningarskjal fyrir þátttökuna og grænan bol með merki félagsins. Kolbrún Stella formaður Þyts veitti verðlaun fyrir stigahæstu þrjá knapa barnaflokks og unglingaflokks.

Stigahæstu knapar í barnaflokki:

1. sæti Eysteinn Tjörvi Kristinsson

2. sæti Rakel Gígja Ragnarsdóttir

3. sæti Ingvar Óli Sigurðsson

 

Stigahæstu knapar í unglingaflokki:

1. sæti Eva Dögg Pálsdóttir

2. sæti Karitas Aradóttir

3. sæti Anna Herdís Sigurbjartsdóttir (Kata tók við viðurkenningunni fyrir hana)

 
 
  • 1
Flettingar í dag: 68
Gestir í dag: 3
Flettingar í gær: 458
Gestir í gær: 70
Samtals flettingar: 3358660
Samtals gestir: 406854
Tölur uppfærðar: 19.12.2018 16:03:07