Færslur: 2011 Nóvember

30.11.2011 21:18

Vöru- og sölukynning

                   

Þann 3. desember nk. verða verslanirnar Kidka og Knapinn Borgarnesi með kynningu og sölu á vörum sínum í Þytsheimum frá kl. 13:00 - 19:00. Einnig verður kynning á spæni frá Skógarvinnslunni og dagatal hestamannafélagsins til sölu frá kl. 13:00 - 16:00 .

Notið ykkur þetta tækifæri til að versla í heimabyggð.     Heitt á könnunni :)

Fræðslunefnd

30.11.2011 20:24

Knapamerki I og II



Fræðslunefnd Þyts er að kanna áhuga á knapamerki I og II fyrir fullorðna. Þeir sem hafa áhuga á að skrá sig á námskeið í vetur, hafið samband við Öldu í síma 847-8842

Fræðslunefnd

28.11.2011 15:51

Ný bók um reið- og gönguleiðir: 1001 þjóðleið




Jónas Kristjánsson hefur áratugum saman skrásett þjóðleiðir á Íslandi og birtist afraksturinn í þessari einstöku bók sem nú býðst félagsmönnum í hestamannafélögum á sérstöku kynningartilboði sem gildir til 1. desember næstkomandi.

Í bókinni er yfir 1.000 reið- og gönguleiðum lýst og þær sýndar á vönduðum kortum. Stafrænn diskur sem gerir kleift að hlaða leiðunum inn í GPS-tæki fylgir.

 Þessi bók er sannkallaður kjörgripur fyrir alla hestamenn sem ferðast um landið!

 Sendið pantanir á tölvupósti: lhhestar@sogurutgafa.is  (tilgreinið nafn, heimilisfang, símanúmer, fjölda eintaka og greiðslumáta (bankamillifærsla eða kreditkort). Eða hringið í síma 557 3100.

28.11.2011 11:00

Dagatal Þyts 2012

Dagatal Þyts 2012 er komið út og er til sölu hjá Árborgu, hægt er að panta það á tölvupóstfangið: tunga2@simnet.is eða í síma 863-6016. Dagatalið kostar kr. 2.000 og er það prýtt myndum frá félagsmönnum ásamt því að helstu viðburðir ársins hjá hestamannafélaginu koma þar fram.

Dagatalið verður svo til sölu upp í reiðhöll 3. des nk. þegar Knapinn og Kidka verða með vörukynningu. Einnig er hægt að nálgast það hjá Dóra og Kollu í Landsbankanum.


27.11.2011 21:57

Hestafimleikar í Landanum



Í Landanum á RÚV núna í kvöld var viðtal við Irinu og Kathrin Schmitt um hestafimleikana. Skemmtilegt viðtal og má sjá það hér.

25.11.2011 22:05

Hesthúsahverfið


Ekki er mikið um hross í hesthúsahverfinu á Hvammstanga þessa dagana, Alda er með hross inni í hesthúsinu hjá Þórdísi, Steina, Gullu og Hjálmari. Leifur var að temja upp í hverfi í haust en er nú farinn til Agnars og Birnu að vinna, þangað til hann fer á Hóla eftir áramót. Önnur hús eru tóm en fólk er samt að undirbúa komu gæðinganna. Í Glaðheimum er verið að klæða húsið að utan. Halli, Bára, Hrannar og Selma eru að byggja nýtt hesthús og er það orðið fokhelt. Í Aðalbóli er búið að vera að taka allt í gegn, fyrir framan kaffistofuna var lagt í gólfin og gerð baðaðstaða fyrir hestana. Ritari síðunnar frétti að einhverjir kappar í Aðalbóli ætli svo að taka inn á sunnudaginn.
Reiðveganefnd hestamannafélagsins eða Gúndi er svo á fullu að skipuleggja og gera nýjan reiðveg frá afleggjaranum að Helguhvammi og meðfram veginum að vatnstankinum. Einnig verður gerð tenging frá reiðvegi að reiðhöll. Stjórn reiðhallarinnar er svo að fara að setja upp nýju ljósin í reiðhöllina og hefst sú vinna á mánudaginn.


22.11.2011 15:30

Vöru- og sölukynning

Þann 3. desember nk. verðar verslanirnar Kidka og Knapinn Borgarnesi með kynningu og sölu á vörum sínum í Þytsheimum frá kl. 13:00 - 19:00. Notið ykkur þetta tækifæri til að versla í heimabyggð, nánar auglýst síðar.

Fræðslunefnd


20.11.2011 21:42

Helga og Hlynur temja myrkranna á milli


tv. Milla Moladóttir og Djásn Geisladóttir dunda sér í gerðinu eftir lærdómsríkan dag.
th. Hula frá Fremri-Fitjum

Helga og Hlynur eru með hross í Mörk og á Höfðabakka. Líf og fjör og nóg að gera segja þau sem er vel. Hlynur vinnur myrkranna á milli í hesthúsinu en Helga vinnur fyrir hádegi virka daga á Leikskólanum Ásgarði en eftir hádegi taka hestarnir við. Þau eru með 22 hross núna í augnarblikinu, og eru með hross og aðstöðu í Mörk og einnig á Höfðabakka. Af þessum eiga þau sjálf 8 tryppi sem eru að fara út fljótlega, sem þau hafa verið að gera reiðfær og önnur koma inn í staðinn.

Meðal hrossa sem eru inni eru 3 stóðhestar sem eru allir á 4. vetur, þeir eru undan Stefni frá Kópavogi, Feld frá Hæli og Geisla frá Fremri-Fitjum. Helga segir að þau séu með mjög lofandi tryppi undan spennandi stóðhestum og má þar nefna: Mola frá Skriðu, Kjarna frá Þjóðólfshaga, Hvin frá Egilstaðakoti, Geisla frá Fremri-Fitjum, Álfi frá Selfossi, Krafti frá Bringu, Þristi frá Feti, Klett frá Hvammi og mörgum fleirum.

Einnig eru þau inni með litla snót sem missti móður sína snemma í haust en það er hún Hula frá Fremri-Fitjum, og var hún tekin inn til að hafa forskot á hin folöldin. ,,Hún vekur mikla lukku og heilsar okkur á hverjum dagi með krúttlegu hneggji, og er mjög skemmtilegt að hafa hana hjá okkur" segir Helga.

Í Mörk hafa Helga og Hlynur verið með hrossin frá því í vor og verða þar áfram í vetur og einnig með eitthvað á Höfðabakka eins og áður hefur komið fram. ,,Okkar hægri hönd Tryggvi Rúnar var plataður fyrir stuttu til að laga gerðið í Mörk, okkur til mikillar gleði. Skemmtanastjórinn Sverrir Sig sér um að halda uppi fjörinu á Höfðabakka, OOOg ekki má gleyma Bústjóranum sjálfum en það ku vera meistarinn Sigurður Björn" segir Helga og þau hlakka til að takast á við verkefni vetrarins :)

Nánar er hægt að fylgjast með okkur á www.123.is/fremri-fitjar


Amon Markúsarson veltir sér eftir góðan sprett


Sverrir og Hlynur skiptast á skoðunum um hrossin


15.11.2011 20:58

Fullt hús á Hrísum 2

Það er nóg að gera í tamningum á Hrísum þessa dagana. Búið að fylla húsið að hrossum frá öðrum og í þeirra eigu, alls 25 stykki. Tamningartryppin eru m.a. undan Roða frá Múla, Aðli frá Nýjabæ, Akk frá Brautarholti, Gandálfi frá Selfossi, Hvessi frá Ásbrún, Nema frá Grafarkoti, Huginn frá Haga, Fróða frá Staðartungu og fleiri góðum. Gréta á Fitjum er að temja með þeim núna, hún er með tvo fola sjálf, annar þeirra er efnilegur stóðhestur undan Ballerínu frá Grafarkoti og Krák frá Blesastöðum. Einnig er Gunnar stórbóndi sérlegur ráðgjafi og eftirlitsmaður búsins. Þannig að það er fjör í Fitjárdalnum!! :)

Yndislega veðurblíðan sem hefur verið núna undanfarna daga gerir þeim kleift að hafa hrossin mikið úti í nokkrum útivistarhólfum fyrir utan hesthúsið.

Frændurnir Hljómur frá Sauðárkróki og Vörður frá Sauðá               -              Hrollur og Stuðull komnir inn.





15.11.2011 20:39

Viðburðadagatal 2012



Viðburðadagatalið 2012 er komið hérna inn á síðuna. Tóta henti þessu upp áðan og svo eiga einhverjir viðburðir eftir að bætast við. Endilega kíkið á þetta og takið frá dagana :)

Mótanefnd Húnvetnsku liðakeppninnar og stjórn Þyts vill líka þakka fyrir góðan fund í gærkvöldi.


14.11.2011 23:00

Enn frekar rólegt á Bessastöðum.


Tamningakonurnar okkar Helga Rún og Fríða Rós klárar í vetrarstarfið og
Prins og Tanja líka.


Á Bessastöðum er allt með rólegasta móti í hesthúsinu þessa dagana. Það er verið að tæma haughúsið og dytta að innréttingum og girðingum. Frumtamningum lauk fyrir um þrem vikum með útskrift á 7 tryppum á fjórða vetur. Þau voru öll orðin reiðfær og eru öll álitleg. Nú eru inni 5 hross, heimasæturnar þjálfa sitt hvort hrossið og hinir þrír voru í fríi í sumar þar á meðal stóðhesturinn okkar hann Sjóður. Eftir 10 daga eða svo tökum við inn 10-12 hross þar á meðal hryssur sem stóðu sig vel á þessu ári. Þegar þau verða komin í gang tökum við hryssurnar á fjórða vetur. Þá eiga að vera komin á járn rúmlega 20 hross.


Magnús Björn fær að taka þátt í hrossaræktinni þó hann vilji ekki á bak. Hér er hann að gera við girðingu útigangshrossanna.Hugsun og Mjölnir frá Bessastöðum gefa góð ráð.


Fríða Rós er að temja Tönju sem við fengum lánaða handa henni frá Gauksmýri.
Það ríkir mikil hamingja á þeim vígstöðvum.




14.11.2011 08:24

Fundur um Húnvetnsku liðakeppnina 2012

Fundur um Húnvetnsku liðakeppnina verður haldinn í Félagshúsi Þyts 2012 mánudaginn 14. nóvember kl. 20.30.

Fyrirhugaðar dagssetningar fyrir mótaröðina 2012 eru:

10. febrúar - Fjórgangur
25. febrúar - Smali og skeið á Blönduósi
16. mars - Fimmgangur og tölt unglinga
14. apríl - Tölt

Einnig mun fræðslunefnd Þyts fara yfir vetrarstarfið.




Mótanefnd Húnvetnsku liðakeppninnar og fræðslunefnd Þyts.


12.11.2011 13:57

Tamningar hafnar í Grafarkoti



Í Grafarkoti hafa ungu tryppin verið inni í 3 vikur og tamningarnar ganga vel. Öll tryppin eru orðin reiðfær og sumum er farið að ríða úti. Um síðustu helgi voru teknar inn hryssur sem voru frumtamdar í fyrra og 4 hryssur sem fara á 6 vetur, svo núna fer að verða aðeins meiri fjölbreytni í vinnunni í hesthúsinu. Hér fyrir neðan eru myndir af Hedvig tamningakonu á tveim ungum Grettisdætrum.



11.11.2011 16:27

Viðtal við Helgu Rún hjá Eiðfaxa

Helga Rún stigahæsti unglingur Þyts

Fréttaritari Eiðfaxa tók viðtal við Helgu Rún á Bessastöðum. Viðtalið má sjá á heimasíðu Eiðfaxa og hér að neðan.

Helga Rún Jóhannsdóttir,  er 15 ára hestakona frá Bessastöðum í Húnaþingi vestra.  Hún var á dögunum heiðruð sem knapi ársins í unglingaflokki á Uppskeruhátíð hjá hestamannafélaginu Þyt, enda var hún dugleg að keppa á félagsmótum sl. ár, þar sem hún kom fram með marga ólíka hesta í eigu og úr ræktun fjölskyldu sinnar á Bessastöðum. Helga Rún hefur stundað hestamennsku frá blautu barnsbeini. Henni finnst lærdómsríkt að vinna með þjál og viljug hross og hefur einstaklega gaman að því að leggja á skeið. Þó Helga Rún stefni að því að verða bakari í framtíðinni ætlar hún sér þó að iðka hestamennskuna af fullum krafti og rækta hross í smáum stíl.


 
- Hvenær kviknaði áhugi þinn á hestum? Hvernig byrjaðir þú að stunda hestamennsku?
Líklega byrjaði ég um leið og ég fæddist, foreldrar mínir tóku mig alltaf með sér upp í hesthús og pabbi tók mig stundum á bak. Ég hef því allt tíð verið í hestunum og haft áhuga á þeim.
- Afhverju hestamennska?
 
Skapgerð hesta er alveg einstök, sérstaklega í íslenskum hrossum. Þau eru svo fús og til í nánast allt, það er því hægt að vinna með þau á svo mismunandi hátt.  Það er gaman að læra að hafa stjórn á hlutunum, en ef eitthvað fer úrskeiðis er alltaf hægt að stoppa og byrja upp á nýtt.
Ég vil vera góður  knapi og vinna með hesta þannig að þeim líði vel og að ég eigi auðvelt með að koma skilaboðum til þeirra. Við eigum marga hesta sem mér finnst vænt um og eru í uppáhaldi. Þeir eiga það allir sameiginlegt  að vera þjálir og þægilegir í umgengni, eru vinnufúsir og auðvelt að fá þá til afkasta þegar um það er beðið. Pabbi leyfir mér að fara á alla hestana sem hann treystir mér til, þar á meðal ungu hrossin og keppnishrossin hans. Ég gleymi því t.d.  aldrei þegar ég lagði í fyrsta sinn á skeið. Þá var ég á Hvirfli, einum af elstu hestunum okkar og það gekk bara rosalega vel. Ég hef lagt marga spretti síðan þá.
Svo er fólkið sem ég umgengst í hestamennskunni  mjög skemmtilegt. Mér finnst líka alltaf gaman að fara á mót, þó ég sé ekki alltaf að keppa.
- Hefur þú keppt mikið á hestamótum?
 
Ég keppti tæknilega séð í fyrsta sinn þegar mamma var ólétt af mér árið 1996 í reiðhöllinni á Þingeyrum. Þar sigruðum "við" í tölti á Brynjari gamla. En ég keppti sjálf í fyrsta sinn á grunnskólamóti á Sauðárkróki fyrir þremur árum og varð þá í fimmta sæti í tölti.  Mér finnst lærdómsríkt að taka þátt í keppnum, því þá kemst ég að því hvað ég get og fæ samanburð. Ekki aðeins til að meta hestinn heldur líka samanburð við aðra knapa. Í ár keppti ég í mörgum greinum á nokkrum hestum og náði góðum árangri með þeim flestum t.d. sigraði ég tvisvar í skeiði á Hvirfli og  verð í þriðja sæti unglingakeppni á Glóðafeyki. Þetta eru báðir hestar úr okkar ræktun á Bessastöðum. 
- Hvað ber að hafa í huga til að ná góðum árangri í hestamennskunni?
 
Að hafa góðan hest að vinna með og hafa nógan tíma til að þjálfa. Svo er oft fínt að eiga einhvern að til að segja sér til.
- Hvaða hross ertu að þjálfa núna?
 
Við erum með fá hross inni núna í nóvember, en eitt af þeim er keppnishestur minn fyrir næsta ár, hann heitir Prins frá Hesti. Hann er ágætis hestur en frekar nýr svo við erum enn að kynnast. Ég er farin að þjálfa hann að mestu leiti sjálf en vegna skóla kemst ég ekki nógu oft í vikunni  svo pabbi fer á bak á honum þegar ég kemst ekki. Mín eftirlætis hross eru þau sem eru auðveld í beisli og þjál. Mér finnst líka gaman ef þau eru rúm á öllum gangi, viljug og stórstíg.
- Hver er besti hestur sem þú hefur setið?
 
Það er líklega Akkur frá Nýjabæ. Hann var keppnis hesturinn minn fyrir tveimur árum og er mjög góður hestur en svolítið kenjóttur. Við seldum hann til Danmerkur, þar komst dýralæknir að því að hann var með klofna tönn sem var ástæðan fyrir þessu ótrausta skapi. Gert var við tönnina og nú líður honum betur, þannig að hann er jákvæðari og nýjum eigendum gengur víst mjög vel með hann.
- Spáir þú eitthvað í hrossarækt?
 
Ég vil helst fá að vita undir hvaða hesta hryssurnar okkar fara og mér finnst gaman að sjá folöldin þegar þau fæðast. Ég hjálpa líka alltaf pabba í frumtamningunum og þegar ég fer á kynbótasýningar pæli ég aðeins í stóðhestunum. En ég er svosem ekki að hugsa um hvaða hryssur passa best undir þann hest sko.
- Hvaða hest hefðir þú viljað taka heim með þér af síðasta Landsmóti?
 
Ölfu frá Blesastöðum, mér fannst hún bara svo flott að sjá úr brekkunni og ég hef setið frænda hennar og þau litu út fyrir að vera svipuð í reið. Hún er líka flottasti töltari sem ég hef séð.
- Hver er flottasti hestur sem þú hefur séð?
 
Flottasti alhliðahestur sem ég hef séð er klárlega Spuni frá Vesturkoti. Þó kemur Frabín frá Fornusöndum sterklega til greina. Hann er hér í þjálfun, ofsalega flottur hestur undan Hreim frá Fornusöndum.
- Hvað ætlar þú að gera í framtíðinni?
 
Ég vil verða bakari en ég mun líklega hafa eina, tvær hryssur í ræktun og auðvitað nokkra hesta á húsi til útreiða.  
Eiðfaxi óskar Helgu Rún góðs gengis á komandi keppnistímabili.

 

09.11.2011 20:56

Allt komið á fullt á Lækjamóti


Kvaran frá Lækjamóti og Kristófer frá Hjaltastaðahvammi.

Ritari Þytssíðunnar ætlar næstu daga að kíkja á tamningastöðvar og fleira á svæðinu. Á Lækjamóti er allt komið á fullt hjá Vigdísi og Ísólfi, þau verða með 18 hross á húsi í vetur. Um næstu helgi verða þau öll komin inn. Þórir tekur svo inn í desember og þá bætast 10-12 við.

Gaman að fá snillingana inn aftur og hefur góða veðrið síðustu daga verið vel nýtt á Lækjamóti í skemmtilega skeifnaspretti :)


t.v Guðmar að teyma stóðhestinn Freyði frá Leysingjastöðum II inn.

t.h Guðmar að fylgjast með Loga járna Stássu frá Naustum.

Flettingar í dag: 178
Gestir í dag: 4
Flettingar í gær: 1186
Gestir í gær: 13
Samtals flettingar: 907955
Samtals gestir: 48700
Tölur uppfærðar: 19.3.2024 05:45:59