Vinamót hestamannafélaganna á Norðurlandi vestra

verður haldið í reiðhöllinni Svaðastaðir á Sauðárkróki sunnudaginn 15. mars kl 13:00

Keppt verður í : Fegurðarreið 7-9 ára - tvígang 10-13 ára - þrígang 10-13 ára - fjórgang 14-16 ára og skeið 14-16 ára.

Skráningar þurfa að berast fyrir kl 22:00 föstudaginn 13. mars.

Við skráningu þarf að koma fram nafn keppanda - fæðingarár - hestamannafélag - nafn hests,  uppruni og litur - upp á hvora hönd er riðið.

Skráningar Þytskrakka sendist á thyturaeska@gmail.com

Skráningargjald er 1000 krónur fyrir fyrstu skráningu og 500 krónur fyrir næstu skráningar og skal greiða á mótsstað áður en mótið hefst (kort ekki tekin).

Reglur vinamóts hestamannafélaga á Norðurlandi vestra

(Lagfært 11.02.2015)

Mótið er hugsað til að efla áhuga á hestaíþróttinni og gefa sem flestum kost á því að taka þátt. Keppt er eftir venjulegum hestaíþróttareglum og dæmt í samræmi við þær, keppni skal stjórnað af þul. Keppendur skulu hneigja sig í upphafi og lok keppni og hlíta fyrirmælum þular í hvívetna. Barnið þarf að vera skráð í hestamannafélag á Norðurlandi vestra eiga þátttökurétt.

1. Mótið heitir Vinamót hestamannafélaga á Norðurlandi vestra.                                           

2. Keppnisgreinar eru:

• Fegurðarreið 7-9 ára. Þar eru riðnir 2 hringir og látið fara fallega. 2 - 3 keppendur inná í einu. Allir þátttakendur komi inn á völlinn í lokin og fá viðurkenningu fyrir þátttöku.

• Tvígangur 10-13 ára. Riðinn einn hringur á annað hvort brokki eða tölti og fet ½ hringur. Áseta og stjórnun dæmd. 2 - 3 keppendur inná í einu.

• Þrígangur 10-13 ára. Riðið einn hringur tölt, einn hringur brokk og ½ hringur fet. Áseta og stjórnun dæmd. 2 - 3 keppendur inná í einu.

• Fjórgangur 14-16 ára. Venjuleg íþróttakeppni, riðnir fjórir og hálfur hringur. Einn hringur hægt tölt, einn hringur brokk, ½ hringur fet, einn hringur stökk og einn hringur fegurðar tölt.

• Þrautabraut 7-9 ára. Knapi einbeitir sér að ásetu, stjórnun og færni. Hringurinn er 3 metrar í þvermál. Engin tímataka. Allir þátttakendur komi inn á völlinn í lokin og fá viðurkenningu fyrir þátttöku.

• Smali 10-13 ára og 14-16 ára. Smalabrautin skal vera skýr og hættulaus og forðast skal allan óþarfa glannaskap. Keppt skal eftir tíma og skal bæta 4 sekúndum við tíma fyrir hverja keilu sem felld er eða sleppt. Ef sleppt er hliði bætast 2x4 sekúndur við. Gult spjald er jafnt og 10 sekúndur og má sýna ef knapi sýnir grófa reiðmennsku og jafnvel víkja keppanda úr sýningu.

  • Bannað er að fara á stökki yfir pallinn

• Tölt 10-13 ára. (T7) Tveir inná í einu, riðið hægt tölt, einn hringur, snúið við og riðin frjáls ferð á tölti, einn hring, alls samtals tveir hringir .

• Tölt 14-16 ára. (T3) Tveir inná í einu, riðið hægt tölt, einn hringur, snúið við og riðið tölt með hraðabreytingum á langhliðum einn hringur og fegurðartölt einn hringur, samtals þrír hringir.

• Skeið 14-16 ára mega keppa í skeiði og skal tímataka vera samkvæmt venju á hverjum stað. Fara skal 2 spretti og betri tíminn gildir.

  • Keppni í skeiði er með fyrirvara um veður og aðstæður á hverjum stað.

  • Gult spjald má sýna ef knapi sýnir grófa reiðmennsku og jafnvel víkja keppanda úr sýningu.

3. Keppandi má koma með hest hvaðan sem er, hesturinn/hesteigandi þarf ekki að vera í hestamannafélagi.

4. Heimilt er að sami hestur sé skráður í 2 greinar, en ekki í sama aldursflokki.

5. Foreldrar mega ekki vera inn á keppnisvellinum meðan á keppni stendur.

6. Keppendur í tví- og þrígangi í flokki 10-13. ára, verða að velja annað hvort tvígang eða þrígang að keppa í. Óheimilt að sami keppandi keppi í báðum greinum.

7. Í tölti, tví-, þrí- og fjórgangi mega keppendur keppa á fleiri en einum hesti, en í úrslitum verður einungis einn hestur frá hverjum knapa.

8. Ef tveir eru jafnir í 5. og 6. sæti skulu báðir mæta í úrslit og verðlauna bæði sætin sem 5. sæti.

9. Járningar, 10 mm skeifur og 250 gr. hlífar eða 8 mm og botnar.

10. Í smala er ekki leyft að ríða við stangir, annars gilda almennar íþróttakeppnisreglur.

11. Í tölti í flokki 10-13 ára og 14-16 ára og fjórgangi 14-16 ára skulu riðin B og A úrslit ef keppendur eru fleiri en 16.

Stigagjöf

Einn keppandi frá hverju hestamannafélagi fær stig óháð því hvort hann nær inn í úrslit eða ekki. Ef fleiri en einn keppendi frá sama hestamannafélagi er í úrslitum fær hestamannafélagið einungis stig fyrir efsta sætið, síðan næsta félag inn í úrslit og svo framvegis.

Tvígangur, þvígangur, fjórgangur, tölt:

1. sæti gefur 10 stig til viðkomandi hestamannafélags

2. sæti gefur 8 stig

3. sæti gefur 7 stig

4. sæti gefur 6 stig

5. sæti gefur 5 stig.

Stig fyrir skeið (öll stigin geta farið til sama hestamannafélags, þetta er aukabúgrein).

1. sæti gefur 5 stig

2. sæti gefur 4 stig

3. sæti gefur 3 stig

4. sæti gefur 2 stig

5. sæti gefur 1 stig.

Stig fyrir þrautabraut og fegurðarreið í flokki 7-9 ára:

Hestamannafélögin fá 2 stig fyrir fyrsta keppanda sem keppir á mótinu , ef það eru fleiri keppendur frá sama hestamannafélagi þá stigar bara 1 keppandi óháð fjölda.