Rakel Ósk Sigurðardóttir, verðlaunaljósmyndari Birtíngs, var á öskufallsslóðum undir Eyjafjallajökli í gær. Meðfylgjandi myndir tók Rakel Ósk af fylfullum merum sem verið var að bjarga undan drungalegu öskufallsskýi eldgossins.

Rakel Ósk fékk þær upplýsingar að þarna hafi verið að reka merarnar í vestur undan öskufallinu eftir að dýralæknir hafði skoðað þær við prestssetrið í Holti.

Eigendunum var tjáð af dýralækni að ef þeim yrði ekki komið undan væru þær í bráðri lífshættu. Þessa smölun festi Rakel á filmu og eins og sjá má er útkoman gríðar sterk.

Myndir Rakelar Óskar hafa vakið verðskuldaða athygli og prýðir ein af myndum hennar til að mynda forsíðu sænska dagblaðsins Göteborgs-Posten í dag.

Rakel var verðlaunuð fyrr á þessu ári fyrir ljósmynd og myndaröð ársins 2009.

Ótrúlegt sjónarspil. Fylfullar merar á flótta undan öskufallsskýinu. Myndir: Rakel Ósk Sigurðardóttir.