Æskulýðsstarf

Hestamannafélagsins Þyts

Starfsskýrsla 2013-2014.

Æskulýðsnefnd Þyts 2013-2014.

Guðný Helga Björnsdóttir, formaður

Helga Rós Níelsdóttir

Irena Kamp

Þóranna Másdóttir

Þórdís Helga Benediktsdóttir, tengiliður við stjórn

Uppskeruhátíð.

Í lok október 2013 var haldin uppskeruhátíð barna og unglinga á Sveitasetrinu Gauksmýri.  Að venju var vel mætt af unglingum, börnum og foreldrum þeirra.  Hestamannafélagið bauð upp á kaffi að hætti Gauksmýrarverta. Á hátíðinni voru veittar viðurkenningar fyrir knapa ársins í unglinga- og barnaflokki. Karitas Aradóttir var knapi ársins í barnaflokki og Kristófer Smári Gunnarsson í unglingaflokki. Öll börn sem tekið höfðu á einhvern hátt þátt í vetrarstarfinu fengu gjafir frá Æskulýðsnefndinni.  Formaður fór yfir starf liðins árs og það sem væri á döfinni á komandi ári. Æskulýðsnefndin þakkaði að lokum iðkendum kærlega fyrir samstarfið og foreldrum og aðstandendum sérstaklega fyrir frábæra þátttöku og viðtökur við hverskonar beiðni um aðstoð.

Þrettándagleði.

Æskulýðsnefndin stóð að venju fyrir Þrettándagleði í sveitarfélaginu. Vegna veðurs var ekki farin hópreið um Hvammstanga, heldur fór gleðin öll fram inni í reiðhöllinni Þytsheimum á Hvammstanga. Þar mættu álfakóngur og -drottning, ásamt álfameyjum, Grýlu, Leppalúða og nokkrum jólasveinum.  Allt voru það krakkar úr æskulýðsstarfi félagsins sem tóku hlutverkin að sér.  Í Þytsheimum var öllum gefið kakó, kaffi og kökur sem foreldrar og aðstandendur í æskulýðsstarfinu höfðu framreitt. Þar voru gengnir nokkrir hringir á eftir álfahirðinni, farið í leiki og teymt undir börnum. Þessi skemmtun tókst mjög vel þrátt fyrir leiðindaveður, og stóðu krakkarnir sig vel að vanda.

Fundir.

Nokkrir fundir voru haldnir á starfsárinu, bæði foreldrafundir um starfið og nefndarfundir.

Reiðþjálfun og fimleikar á hesti (voltigieren).

Mikill áhugi var á reiðþjálfun og fimleikum á hesti. Um 60 börn á öllum aldri tóku þátt í reiðþjálfun, fimleikum á hesti, reiðsýningu, keppni og Knapamerki í vetur. 2 unglingar luku prófi í Knapamerki 1 og 6 luku prófi í Knapamerki 3. Fanney Dögg Indriðadóttir sá um reiðkennsluna og Knapamerkin. Irina Kamp og Kathrin Schmitt sáu um fimleika á hesti.  Þátttakan í reiðþjálfuninni var það mikil að hóparnir voru sex, mislangt komnir krakkar í þeim og fengu þjálfun við hæfi hvers hóps. Svo vorum við með þjálfun fyrir allra yngstu knapana, um hana sáu krakkarnir í Knapamerki 3. Sú þjálfun var á laugardögum og komu foreldrarnir með, því það þurfti að hjálpa sumum knöpunum, sem ekki voru háir í loftinu.

Mjög mikil þátttaka var í námskeiðinu fimleikar á hesti. Það eykur mjög jafnvægi krakkanna að taka þátt í æfingum sem þessum, einnig er það mjög gott fyrir þau sem hafa ekki aðgang að hestum að geta verið á þessum námskeiðum og eflir þetta mjög áhuga þeirra á hestamennskunni. Í fimleikum á hesti var byrjendahópur og svo hópur fyrir lengra komna. Bæði var kennt í íþróttahúsinu á fimleikahestum og í reiðhöllinni á alvöruhestum.

Á haustin fara hestafimleikarnir allir fram í íþróttahúsinu á Laugarbakka. Þar var verið að æfa krakkana í grundavallaratriðum fimleika og undirbúa þau undir að gera æfingar á lifandi hesti.

Grunnskólamótin.

Æskulýðsnefndir hestamannafélaganna á Norðurlandi vestra halda þrjú mót yfir veturinn, sem þau kalla Grunnskólamót. Þá keppa krakkarnir fyrir þann skóla sem þau eru í og safna stigum. Mótin voru haldin í Arnargerði á Blönduósi, í Svaðastöðum á Sauðárkróki og í Þytsheimum hér á Hvammstanga. Góð þátttaka var í þessum mótum. Þau eru byggð upp á því að allir geti tekið þátt og æft sig í að keppa. Keppt er í þremur aldursflokkum. Elsti hópurinn 8. - 10. bekkur keppa í tölti, fjórgangi, smala og skeiði. 4.-7. bekkur keppa í smala, tölti, og tví- eða þrígangi. Í tvígangi sýna þau fet og tölt eða brokk, í þrígangi sýna þau fet, tölt og brokk. Ekki þurfa þessi aldursflokkar að sýna stökk, enda getur það verið erfitt fyrir lítið reynda knapa inni í reiðhöllunum. Yngsti aldursflokkurinn í 1. - 3. bekk keppa í þrautabraut og fegurðarreið. Þetta árið var vont veður þegar smalakeppnin fór fram á Blönduósi þannig að Skagfirðingarnir komu ekki til keppni þá.

Sýningar.

Hestamannafélagið stóð þann 29. mars fyrir reiðhallarsýningu sem hét Hestar fyrir alla. Þar tóku krakkar úr æskulýðsstarfinu virkan þátt. Kappkostað var að á sýningunni væri hægt að sjá sem fjölbreyttasta nýtingu á hestinum, frá þægum fjölskylduhesti yfir í stólpa keppnishest og allt þar á milli. Börn og unglingar úr æskulýðsstarfinu voru með opnunaratriðið og mörg atriði úr æskulýðsstarfinu voru inn á milli atriða fullorðna fólksins. Fullt af myndum má sjá af sýningunni á þessum slóðum: http://thytur.123.is/photoalbums/259344/

http://thytur.123.is/photoalbums/259259/

Hestafimleikahópurinn fór á vorsýningu Sleipnis á Selfossi og sýndu atriði. Það var mjög skemmtileg sýning og skemmtileg ferð. Jafnframt því að æfa fyrir sýninguna og taka þátt í sýningunni var ýmislegt skemmtilegt gert í ferðinni, t.d. farið í reiðtúr á hestaleigu í nágrenni Selfoss.

Sumarið.

Krakkarnir og unglingarnir voru dugleg og að taka þátt í ýmsum keppnum í sumar bæði í heimahéraði og nálægum héruðum.  Þó eru þau ekki eins mörg sem taka þátt í keppnum yfir sumarið eins og í reiðhallarmótunum á veturna. Þeim börnum og unglingum sem komust á Landsmótið stóð til boða að fá leiðbeiningar og aðstoð frá Fanneyju Dögg Indriðadóttur. Flottir fulltrúar frá okkar félagi mættu svo galvaskir á Landsmótið og stóðu sig mjög vel í keppni þrátt fyrir úrhellis rigningu og rok. Þau voru einnig fulltrúar Þyts í hópreiðinni og stóðu sig með stakri prýði þar eins og ávalt.

Við í æskulýðsnefnd Þyts erum mjög ánægð með árið hjá okkur. Foreldrar hafa verið mjög duglegir eins og áður að aðstoða við það sem þarf, enda gengi ekki svona starf nema með virkum foreldrum því margir eiga um langan veg að fara til að mæta á námskeið, æfingar eða keppni allan veturinn, einnig þurfa yngstu þátttakendurnir digga aðstoð við að komast upp í hesthús og leggja á.  Vonum við að starfið haldi áfram að blómstra eins og verið hefur undanfarin ár.

Mikið af myndum er hægt að sjá úr starfinu í myndaalbúmi á heimasíðu Þyts: thytur.123.is.

Kær kveðja

Æskulýðsnefnd Þyts.

Punktar úr fundargerð:

Nú erum við að skipuleggja vorönnina og þurfum við því að vita hvaða börn vilja fara á reiðnámskeið. Sumir hafa nú þegar skráð sig, þegar uppskeruhátíðin var haldin, en óskum við eftir að þeir sem ekki eru búnir að því skrái sig fyrir 5. desember nk. á netfangið thyturaeska@gmail.com. Nánari upplýsingar má fá þar eða hjá Helgu Rós í síma 848-7219.

Þau reiðnámskeið sem við viljum bjóða upp á eru;

-yngsti hópurinn (kennt aðra hverja helgi og foreldrar eða einhver fullorðinn þarf að vera með hverju barni og hesti)

-reiðnámskeið

-keppnisþjálfun

-knapamerki

-TREC

Ef lítil skráning er í einhverja hópana gæti þurft að fella það námskeið niður.

TREC:

TREC er vaxandi grein hér á landi enda fellur hún vel að okkar hestamennsku og íslenska hestinum. Greinin er hestvæn og styrkir samspil hests og knapa en er allt í senn spennandi, skemmtileg, fjölbreytt og fræðandi. Áherslan verður á ásetu og stjórnun þar sem markmiðið er að komast í gegnum TREC braut eða keppa í greininni og er reiknað með að kennt verði á hálfsmánaðar fresti. Hér meðfylgjandi er myndband frá Hestamannafélaginu Funa, https://www.youtube.com/watch?v=pJMyL4fwdNs#t=29

Þeir sem hafa áhuga á að fara á Æskan og hesturinn sem halda á í byrjun maí 2015 á Sauðárkróki endilega skráið sig og ef þið eruð með hugmyndir að atriði þá koma þeim á framfæri.

Komnar eru dagsetningar fyrir Vinamót hestamannafélaganna Norðurlandi vestra (sem áður hét Grunnskólamót), birt með fyrirvara um breytingar;

15. febrúar - Blönduós

15. mars  - Sauðárkrókur

12. apríl - Hvammstangi

Mótin verða haldin með sama sniði á áður.

--

Kveðja
Æskulýðsnefnd Þyts

Almennur félagsfundur verður haldinn í félagshúsi Þyts, miðvikudaginn 19. nóvember og hefst kl. 20.30

Dagskrá fundarins er:

1. vetrarstarfið

 2. önnur mál

Stjórn Þyts

Í dag var á Sveitasetrinu Gauksmýri haldin uppskeruhátíð æskulýðsstarfsins hjá Þyti. Mörg af börnunum og unglingunum sem tóku þátt í starfinu síðastliðið starfsár mættu til að taka á móti viðurkenningum fyrir þátttökuna og fá veitingar að hætti Gauksmýrarverta.

Um 60 börn og unglingar tóku þátt í starfinu síðasta starfsár. Starfið var mjög fjölbreytt: hestafimleikar, reiðnámskeið, Knapamerki 1 og 3, reiðhallarsýning og ýmis mót sem þau tóku þátt í.

Allir krakkarnir fengu viðurkenningarskjal fyrir þátttökuna og grænan bol með merki félagsins. Kolbrún Stella formaður Þyts veitti verðlaun fyrir stigahæstu þrjá knapa barnaflokks og unglingaflokks.

Uppskeruhátíð Hrossaræktarsamtaka V-Hún og Hestamannafélagsins Þyts 2014

Verður haldin laugardagskvöldið 1.nóvember í Félagsheimilinu á Hvammstanga. Matur, gleði og gaman.

Þessi frábæra skemmtun hefst stundvíslega kl 20:00 en húsið opnar kl 19:30 og það verður sko stemming.

Þórhallur Sverrisson sér um matinn og á boðstólnum verður:

Smáréttahlaðborð:

Naut-tariki-sesam, fígja-hráskinka-Salvía, rifin heil önd í pönnuköku, pullpork í kleinuhring, mini hamborgarar, laxatartar með mango avakado, birkireyktur lax á blákartöflu, rækjur í rugli, foie gras með koniaks döðlum, bacon-döðlur, fannel og koriander grafinn lax, bláskel í humarsoði, piri piri kjúklingur með chilli, creola kjúklingur með jalapeno, ostar, blini og caviar, alvöru pepperoni og ítalskt smábrauð

Sushi Maki:

Krabbi, Lax, Rækja

Heitur matur:

Súrsætur kjúklingur, djúpsteiktur laukur í chilli, buffalo kjúklingur, rækjubollur í mangó og kjúklingur í satay

Veislustjórn verður í höndum Andreu.

Forsala miða og pantanir fara fram í Söluskálanum á Hvammstanga, sími 451-2465 og þarf að vera lokið að kvöldi miðvikudagsins 29.október, athugið ekki posi. Miðaverð á uppskeruhátíðina er kr 6.800 matur, skemmtun og ball, en ef þú vilt hins vegar bara skella þér á dansleik með Trukkunum, sem hefst kl 00:00, þá kostar það litlar 3000 kr. Enginn posi á staðnum og ekki selt gos!

Eftirfarandi bú eru tilnefnd ræktunarbú ársins af Hrossaræktarsamtökum V-Hún.

Grafarkot– Lækjamót – Syðri-Reykir

Athugið að það eru allir velkomnir á þessa frábæru skemmtun. Þetta er einstakt tækifæri til að hlæja, gráta og hafa gaman.

Athugið ?

Svo framarlega sem þú átt lausan dag, gaufastu til að láta sjá þig

Sjáumst nefndin.

 

Laugardaginn 1. nóvember kl. 14:00 verður Æskulýðsnefndin með uppskeruhátíð fyrir börn og unglinga sem tóku þátt í starfinu hjá Þyti síðastliðinn vetur og sumar. Hátíðin verður  í Sveitasetrinu Gauksmýri.

Veittar verðar viðurkenningar fyrir þátttökuna í starfinu, greint frá því hvað verður framundan og tekið við skráningum í námskeið vetrarins.

Vonumst til að sjá sem flesta sem tóku þátt í hestafimleikunum, reiðþjálfun, Knapamerkjum, sýningum, keppnum og öðru skemmtilegu sem við gerðum á árinu, bæði börnin, unglingana og aðstandendur þeirra.

Æskulýðsnefndin

Ég var beðin um að semja auglýsingu um uppskeruhátíð Hestamannafélagsins Þyts og Hrossaræktarsamtakanna sem verður haldin þann 1. nóvember í Félagsheimilinu á Hvammstanga.

Það er talið að þarna verði gaman.
Enn eru ekki komin nein skemmtiatriði vegna andleysis nefndarinnar sem hugsanlega má rekja til mengunarinnar frá Holuhrauni, enginn veislustjóri kominn á blað, sennilega af sömu ástæðu, en það er talið líklegt að það verði hljómsveit, en af því að það er ekki Geirmundur þá man enginn hvað hún heitir.
Það verður matur . Þórhallur Sverrisson er búinn að lofa að sjá um hann.
Þeir sem lifa á brúninni og halda að hugsanlega, kannski gæti orðið gaman eru vinsamlega beðnir að taka daginn frá
Vonandi koma betri upplýsingar fljótlega

Bestu kveðjur Haddý

Komin er tillaga að dagssetningum móta 2015 í Húnvetnsku liðakeppninni, ef gerð verður breyting verður það tilkynnt á almennum félagsfundi í byrjun nóvember.

14. feb smali
6. mars fjórgangur (ath breytt dagssetning)
20. mars fimmgangur
17. apríl tölt (og skeið)

myndir frá námskeiði.

Fyrirhugað er að halda frumtamningarnámskeið á vegum fræðslunefndar Þyts, í nóvember eða janúar. Kennari verður Þórir Ísólfsson. Áhugasamir hafi samband við Evu í síma 868 2740 eða Esther í síma 661 6170 fyrir 20. október.

Inn í myndaalbúmi má sjá myndir frá námskeiðunum sem haldin voru 2012 og 2013.

Fræðslunefnd

Uppskeruhátíðin verður haldin hátíðleg 1.nóvember.  Takið daginn frá.  Nánar auglýst síðar:)