Hestamannafélagið Þytur

20.01.2014 15:42

Tjarnartölt 2014

Frá mótinu í fyrra.

Sveitasetrið Gauksmýri og Hestamannafélagið Þytur halda sameiginlega ísmót á Gauksmýrartjörn laugardaginn 25. janúar nk og hefst mótið kl 12:30. Ísinn er spegilsléttur að sögn Jóhanns svo nú er um að gera að skrá á fyrsta mót ársins.

Keppt verður í tölti í 3 flokkum:

1. 1.flokki

2. 2.flokki

3. Barna og unglingaflokki.

5 keppendur í úrslit í öllum flokkum.

Riðið verður ein ferð á hægu tölti, 2 ferðir hraðabreytingar og 1 ferð hratt tölt.

Einnig verður keppt í unghrossaflokki ef næg þátttaka næst, en það eru hross fædd á árunum 2008 til 2010 sem eiga þátttökurétt. Þetta verður 4 ferðir (2 fram og til baka), frjáls reið.

Skráning á netfangið thytur1@gmail.com . Lokaskráningardagur er föstudagurinn 24. janúar, skráningargjald er 1.000.- fyrir fullorðna hver skráning en 500 hver skráning fyrir börn og unglinga. Skráningargjald má leggja inn á 0159-26-001081 kt. 550180-0499.

Nánari upplýsingar hjá Jóa í síma 869-7992

Hægt að koma hestum í hús á Gauksmýri meðan húsrúm leyfir.

Veitingasala verður í veitingasalnum á Gauksmýri.

Ef fella þarf mótið niður vegna veðurs birtist það á heimsíðu Þyts á laugardagsmorgun.

Sveitasetrið Gauksmýri og Hestamannafélagið Þytur

Skrifað af Kolla

18.01.2014 15:36

Námskeið!

Helgarnámskeið 14.-15. Febrúar 2014

Almennt reiðnámskeið - Taumsamband - Áseta og stjórnun.

Staðsetning: Reiðhöllin á Hvammstanga

Sýnikennsla og spjall föstudagskvöldið 14. febrúar Kl. 20:00

Laugardagur: byrjar kl. 09:30. Hóptími, 3-4 saman fyrir hádegi í 50 mín. (fer eftir fjölda á námskeiði).

Einkatími 30 mín, byrjað kl. 13:00. Öllum sem eru á námskeiðinu heimilt að fylgjast með hvort öðru.

Verð: 10.000 kr. á mann

Kennari: Fanney Dögg Indriðadóttir reiðkennari.

Skráning og nánari upplýsingar hjá Maríönnu (mareva@simnet.is) í síma 896 3130 og Öldu í síma 847 8842, fyrir miðvikudaginn 12.febrúar.

Ef áhugi er fyrir hendi getum við einnig boðið upp á frumtamningarnámskeið eins og var í desember síðastliðnum, í umsjón Þóris Ísólfssonar reiðkennara. Námskeiðið er 12 tímar; 2 bóklegir og 10 verklegir. Verð: 30.000 kr. Hafið bara samband við okkur og þegar nægur fjöldi er kominn þá skellum við því í gang.

Skrifað af Maríanna

12.01.2014 23:06

Reglur Húnvetnsku liðakeppninnar 2014

Sjötta mótaröðin að hefjast í Húnvetnsku liðakeppninni. Mótanefndin ákvað að breyta til í ár, bæði í sambandi við stigagjöfina og liðin. Taka upp stigagjöf sem er að mestu eins og er í KB mótaröðinni í Borgarnesi. Við fengum upplýsingar hjá aðila í mótanefndinni þar og okkur leyst vel á þessa leið. Einnig verður hægt að bæta við fleiri liðum í keppnina ef áhugi er fyrir því, þ.e.a.s ef fólk skipta sér í minni og fleiri lið er það núna möguleiki. En ef það myndast ekki nægilega mörg lið, ætlum við að bjóða upp á lið 1, 2 og 3 eins og þau hafa verið hingað til. Setjum þetta bara í ykkar hendur og sjáum hvernig málin þróast. Bæjarkeppnin verður ef liðin verða bara þrjú en ef liðin verða fleiri og minni þá sleppum við henni.

Reglur:

Liðakeppni:

1) Liðin þurfa að hafa nafn og sérkenni, þannig að liðsmenn þekkist.

2) Lágmark 3 í liði, ótakmarkaður fjöldi.

3) Knapar verða að vera í sama liðinu allt tímabilið, þ.e. bannað að skipta um lið á miðju tímabili. Einnig verður hver og einn knapi að velja sér hvort hann ætlar að keppa í 1. 2. eða 3. flokki í upphafi tímabils.

4) 3 efstu knapar úr forkeppni telja til stiga fyrir hvert lið, stigin eru einkunnir hvers knapa. Hver knapi getur aðeins skilað stigum fyrir sitt lið fyrir 1 hest.

5) 3 efstu knapar sem komast í úrslit í hverju liði telja til stiga.

6) 1 sæti = 10 stig, 2 sæti = 8 stig, 3 sæti = 6 stig, 4 sæti = 4 stig, 5 sæti = 2 stig, 6 sæti = 2 stig (ef B-úrslit), 7-10 = 1 stig

7) Ekki er nauðsynlegt að vera í liði til að taka þátt í mótaröðinni.

8) Flokkar; Barna og unglingaflokkur 17 ára og yngri (börn fædd 1997 og seinna), 3 flokkur, flokkur sem er ætlaður þeim sem eru að byrja að keppa eða hafa litla keppnisreynslu. 2 flokkur = fyrir þá sem hafa nokkra keppnisreynslu en eru ekki að stunda keppni að neinu ráði. 1. flokkur er ætlaður þeim sem eru mikið í keppni.

9) Hver keppandi má keppa á fleiri en einum hesti í hverri grein, en ef keppandi kemst með tvo hesta í úrslit verður hann að velja á milli þeirra og aðeins keppa á öðrum í úrslitum. Ekki hægt að fá aukaknapa til að ríða úrslit fyrir sig.

10) Í skeiði má hver knapi keppa á eins mörgum hrossum og hann vill en getur aðeins fengið stig fyrir einn hest eins og í öðrum greinum.

11) Smalinn: Riðin er braut sem mörkuð er keilum sem ná upp á síður hests. Keilurnar skulu vera þannig útbúnar að þær falli við litla snertingu. Árangurinn ræðst af brautartíma og felldum keilum. Reiknireglur eru þær sömu og í tímabraut torfærunnar. Smalinn er hrein grein í þeirri merkingu að árangurinn er mælanlegur án frávika, þ.e. hann ræðst eingöngu af tíma og felldum keilum en ekki mati dómara. Dómarar eru engu að síður til staðar og meta hvort knapinn fari gegnum öll hlið, telja felldar keilur og hafa eftirlit með reiðmennsku knapa líkt og í öðrum keppnisgreinum.

Stigin telja þannig að knapar raðast í sæti eftir besta tímanum, sá sem er fyrstur fær 300 stig, sá næsti 280, 270 o.s.frv. Við hverja fellda keilu dragast frá 14 stig. Fyrir sleppt hlið eru 28 refsistig. Yfir brúnna er ekki leyft að fara á stökki þ.e.a.s allur annar gangur er í lagi. Ef brúnni er sleppt þá er það 4x28 refsistig Gult spjald= gróf reiðmennska 30 refsistig Rautt spjald= MJÖG gróf reiðmennska ÚR LEIK!
Stigin í smala inn í liðakeppnina í forkeppni eru þannig að 300 stig gefa 6 stig, 290 - 299 stig gefa 5,8 stig, 280 - 289 stig gefa 5,6 stig, 270 - 279 stig gefa 5,4 stig osfrv.

12) Einstaklingskeppni:
1.sæti - 10 stig
2.sæti - 8 stig
3.sæti - 7 stig
4.sæti - 6 stig
5.sæti - 5 stig
6.sæti - 4 stig
7.sæti - 3 stig
8.sæti - 2 stig
9.sæti - 1 stig

13) Skráningargjöld verður að greiða inn á reikning 0159-15-200343 kt. 550180-0499 áður en mót hefst.

Ný lið þarf að tilkynna til mótanefndar í síðasta lagi sunnudaginn 26. jan nk. Á móti skráningum tekur Þórdís á netfang: rettarh6@simnet.is Ef ykkur vantar frekari upplýsingar er hægt að hringja í síma 867-3346, liðin þurfa að hafa nafn og einhvern liðsstjóra.

Dagssetningar fyrir mót vetrarins eru: 8. feb fjórgangur, 22. feb smali/skeið, 15. mars fimmgangur/tölt 5. apríl tölt.

Mótanefndin

Skrifað af mótanefnd

11.01.2014 19:06

Ísólfur íþróttamaður ársins í Húnaþingi

Á myndinni eru, frá vinstri talið, Ísólfur, Guðrún Gróa og Salbjörg Ragna.

Kjöri íþróttamanns USVH (Ungmennasambands Vestur-Húnavatnssýslu) var lýst í Íþróttamiðstöðinni á Hvammstanga, þann 28. desember sl. Íþróttamaður USVH í Húnaþingi vestra árið 2013 var kjörinn Ísólfur Líndal Þórisson hestaíþróttamaður frá Lækjamóti í Víðidal en hann hlaut 50 stig í kjörinu. Innilega til hamingju Ísólfur.

Í öðru sæti varð Salbjörg Ragna Sævarsdóttir körfuknattleikskona hjá Umf. Njarðvík með 26 stig og í þriðja sæti Guðrún Gróa Þorsteinsdóttir körfuknatleikskona hjá Umf. Snæfelli með 22 stig. Verðlaunahafar hlutu eignarbikara og Ísólfur farandbikar auk styrks frá Landsbankanum á Hvammstanga.

Ísólfur sem keppir fyrir Hestamannafélagið Þyt hefur á undanförnum árum skipað sér í raðir bestu hestamanna landsins. Árið 2013 var honum farsælt á keppnisbrautinni og keppti hann á mörgum mótum með frábærum árangri og hlaut Ísólfur titilinn gæðingaknapi ársins 2013 á Uppskeruhátíð hestamanna á landsvísu. Árangur Ísólfs á árinu er mjög góður og hæst ber eftirfarandi:

Ísólfur var langstigahæsti knapi ársins hjá Þyt og fékk hvorki meira né minna en 782 stig . (í fyrra 441 stig)

Hann var sigurvegari í B-flokki gæðinga á Fjórðungsmótinu á Vesturlandi, en Ísólfur kom 3 hestum í úrslit í þeim flokki.

Á Íslandsmótinu varð hann níundi í fimmgangi og fimmti í tölti og fjórgangi. Semsagt í A-úrslitum.

Í Meistaradeild Norðurlands sigraði hann fjórgang og fimmgang, varð annar í tölti, fimmti í T2 (slaktaumatölt), fjórði í skeiði og endaði meistaradeildina með að vera stigahæsti knapinn.

Íþróttamenn USVH geta orðið þeir íþróttamenn 16 ára og eldri sem lögheimili eiga í Húnaþingi vestra eða keppa undir merkjum félaga innan USVH.

Það eru stjórnarmenn í aðildarfélögum USVH og stjórn USVH sem kjósa íþróttamanninn.

heimild: nordanatt.is

Skrifað af Kolla

10.01.2014 10:33

Reiðnámskeið fyrir börn og unglinga

Skráningarfrestur á reiðnámskeiðin fyrir börn og unglinga er að renna út. Endilega skrá sig þeir sem vilja vera með á skemmtilegum námskeiðum í vetur. Námskeiðskostnaður fyrir 10 tíma námskeið er 6.000 kr. Byrja um mánaðamótin janúar/febrúar.

Svo eru komnar myndir í myndaalbúm heimasíðunnar af Þrettándagleðinni, sem var haldin inni vegna leiðinda veðurs.

Skrifað af Kolla

05.01.2014 20:44

Þrettándagleðin í Reiðhöllinni

Vegna óhagstæðrar veðurspár ætlum við að hafa þrettándagleðina í reiðhöllinni á morgunn.

Það verður því engin skrúðganga um Hvammstanga, heldur verður skrúðganga inni í reiðhöllinni, er það ekki eitthvað?

Hittumst í reiðhöllinni Þytsheimum á morgunn kl. 17:00, kveðjum jólin og gleðjumst yfir nýju ári.

Skrifað af Guðnýju

04.01.2014 23:48

Dagatal Þyts 2013

Dagatal Þyts hefur verið til sölu síðan í lok nóvember, enn eru eintök til sölu, stk kostar 2.000, þeir sem vilja dagatöl endilega hafið samband við Vigdísi í síma 895-1146 eða Kollu í síma 863-7786. Einnig hægt að fá þau í Landsbankanum og svo verða þau til sölu á þrettándagleði Þyts á mánudaginn.
Svo þið sem eigið eftir að kaupa, endilega drífið í því og styrkið félagið í leiðinni :)

Skrifað af Kolla

04.01.2014 10:59

Þrettándagleði

Þrettándagleði verður haldin mánudaginn 6. janúar nk. kl. 17:00

Farið verður frá Pakkhúsplani KVH á Hvammstanga kl: 17:00. Álfakóngur, álfadrottning, hirðmeyjar ásamt Grýlu, Leppalúða og jólasveinum leiða gönguna upp í reiðhöllina Þytsheima. Stoppað verður við sjúkrahúsið og sungnir áramótasöngvar.
Í Þytsheimum munu jólasveinar, Grýla og Leppalúði syngja og tralla með okkur og börnunum boðið á hestbak.

Foreldrar barna í æskulýðsstarfinu bjóða upp á kökur og brauðmeti og veitinganefnd Þyts býður upp á kaffi og kakó.

Vonumst til að sjá sem flesta á hestum og gangandi og eigum góða stund saman.

Kveðja Æskulýðsnefnd Þyts.

Ps: ef veðurútlit verður vont gæti dagskráin breyst, það verður þá auglýst

á heimasíðu Þyts: thytur.123.is

Ágætu íbúar vinsamlegast skjótið EKKI upp flugeldum á meðan gangan fer fram, þar sem hross geta auðveldlega fælst og valdið slysum.

Skrifað af Guðnýju

24.12.2013 16:38

Gleðileg jól

Stjórn Þyts sendir Þytsfélögum sem og öllum Húnvetningum bestu óskir um gleðileg jól og farsældar á komandi ári með þökk fyrir samstarf, ánægjuleg samskipti og stuðning á árinu sem er að líða.

Skrifað af Kolla

13.12.2013 10:37

Komnar eru dagssetningar fyrir mót vetrarins. 8. feb fjórgangur, 22. feb smali/skeið, 15. mars fimmgangur/tölt 5. apríl tölt.
Á félagsfundi í nóvember var ákveðið að halda áfram með liðakeppni og kallað var eftir nýju fólki í nefndina (ef einhvern langar að starfa í nefndinni endilega hafið samband við Þórdísi eða Kollu). Síðan mun ný nefnd funda og koma með sínar tillögur og breytingar ef einhverjar verða, í byrjun janúar.

Einnig er komin dagssetning fyrir ísmót á Gauksmýri, en áætlað er að halda ísmótið laugardaginn 25. janúar nk.

Kæru félagar einnig vantar fólk í aðrar nefndir, meðal annars mannvirkjanefnd, sýninganefnd og firmakeppnisnefnd, einnig vantar stjórnarmenn í stjórn Þytsheima, endilega hafið samband við einhvern í stjórn Þyts ef þið viljið starfa í nefndum og vera með í fjörinu. Starfssemi félagsins byggir nefnilega á félögunum og þátttöku þeirra og því miður hefur gengið illa að fá fólk til að starfa í ákveðnum nefndum.

Skrifað af Kolla

11.12.2013 14:38

Formleg opnun á reiðhofi

Á laugardaginn 13. desember frá kl. 14-16 bjóða Jói Magg. og fjölskylda á Bessastöðum alla velkomna að koma og skoða hið nýja reiðhof sem verið er að taka í notkun á búinu.

Það er upplagt fyrir fólk að líta upp úr amstri hversdagsins og jólaundirbúningsins og kíkja við á Bessastöðum til að skoða þessa frábæru viðbót við inniaðstöðu til tamninga og þjálfunar á hrossunum.

Á heimasíðu Bessastaða er hægt að sjá frétt af tilurð hofsins: http://bessast.123.is/blog/2013/10/23/reumst-i-byggingu-a-reihofi/

Skrifað af Kolla

05.12.2013 09:51

Pakkhúsið kallar !!!

Erum búnir að taka inn nýjar hestavörur frá Líflandi, t.d kuldagalla, hnakka, járningavörur og fleira tilvalið í jólapakkann og allt á jólatilboði. Endilega kíkið við í rólegt og gott afsláttarumhverfi, heitt á könnunni.

Jólatilboð er allt frá 10% afsláttur og er á öllum hestavörum frá Líflandi.

Barnahnakkur....... 26990 kr

Kuldagalli MB........34990 kr

Forest reiðúlpa......21990 kr

Reiðhjálmur..........21990 kr

Impact reiðbuxur...14990 kr

Öll verð eru án afsláttar. Við getum pantað það sem þig vantar.

Einnig verður 50% afsláttur af classic mix hestamúslí meðan birgðir endast.

Pakkhúsmenn

Skrifað af Kolla

03.12.2013 20:11

Helga Rún frá Bessastöðum í viðtali.

í atriðinu með dreifnáminu á Þytssýningunni 2013 á Elfu frá Kommu

Nafn: Helga Rún Jóhannsdóttir
Skóli: Fjölbrautaskóli Norðurlands-vestra, dreifnámið
Uppáhaldsdrykkur: græn v-sport og appelsínudjús.
Uppáhaldsmatur: nautasteik með kryddbrúnuðum kartöflum og einhverri góðri sósu
Hvenær ætlar þú að taka inn? Við byrjuðum að taka inn eldri hrossin í nóvember. Í haust höfum við verið að vinna með frumtamningatryppin en þau eru komin í frí núna.
Hvað finnst þér vera það besta við hestamennskuna: Þegar maður sér árangurinn í því sem maður er að gera, þegar maður er búinn að leggja blóð, svita og tár í vinnuna og maður sér að hún er að borga sig. Og síðan skemmir ekki fyrir hversu mikið af skemmtilegu fólki maður tengist í gegnum hestana.
Hver er skemmtilegasti hestur sem þú hefur þjálfað og af hverju? Embla frá Þóreyjarhnúpi. Hún er svo jákvæð og hlíðin, með einstaklega góðar grunngangtegundir og auðveld í umgengni.
Hefur þú áhuga á ræktun? Ef svo er hver er uppáhalds stóðhesturinn þinn og af hverju?
Já, ég hef alveg dágóðan áhuga á ræktun. Uppáhalds stóðhesturinn minn er líklega Óskasteinn frá Íbishóli. Vegna þess að hann er með svo gott geðslag og svo eðlisgóðar gangtegundir.
Hvað er skemmtilegasta atriði sem þú hefur tekið þátt í á sýningum með Þytsfélögum?
Það hefur verið mjög gaman í öllum fánareiðunum á stóru mótunum, þá hversu góðir stuðningsmenn þytsfélagar geta verið á meðan að reiðinni stendur. En síðan var atriðið sem við fórum með á Æskan og hesturinn árið 2011 mjög skemmtilegt og flott.
Finnst þér gaman að keppa? Einhver árangur sem stendur upp úr? Já, mér finnst alveg ágætt að keppa og koma fram á þeim hrossum sem ég er búin að vera að þjálfa. Bæði til að fá staðfestingu á því hvernig hesturinn er að heiman og til að fá álit frá öðrum. Eftirminnilegasti árangurinn var þegar ég vann Ásdísi frænku mína í tölti í liðakeppninni í hittifyrra. Þá var ég á Oddvita frá Bessastöðum og við unnum okkur upp úr B-úrslitum og ég var líka ein því foreldrar mínir höfðu eitthvað betra að gera. Svo var líka rosalega gaman á úrtökunni í vor á Emblu frá Þóreyjarhnúpi þegar við unnum unglingaflokkinn en hún er bara 5 vetra og ég hafði þjálfað hana sjálf frá því hún kom inn í desember.
Hver er helsta fyrirmyndin þín í hestamennskunni: Ætli það sé ekki bara hann faðir minn.
Eitthvað sem mætti bæta við æskulýðsstarfið? Nei, mér finnst það ósköp gott eins og það er. En mér fannst frekar fúlt að það var ekki farið í hestaferðina á fjórðungsmótið.

Embla frá Þóreyjarnúpi sem Helga sigraði unglingaflokkinn í sumar á

Mynd frá Bessastöðum á reiðhallarsýningu Þyts sl vetur.

Skrifað af Kolla