Kristján Elvar Gíslason járningameistari mun koma á vegum hestamannafélagsins Þyts á Hvammstanga helgina 11. og 12. mars .

Fyrirkomulagið á námskeiðið verður:
Laugardagur fyrir hádegi , fyrirlestur og sýnikennsla í Þytsheimum, eftir hádegi verklegt.
Sunnudagur: fyrir hádegi hópur 1 verklegt og eftir hádegi hópur 2 verklegt
Verð: 35.000, innifalið eru skeifur einn gangur og fjaðrir.

Súpa í hádeginu á laugardag og kaffi veitingar laugardag og sunnudag

Skráning: kolugil@centrum.is Malin 8476726

Fyrsta mót vetrarins verður laugardaginn 25. febrúar nk kl. 15.00 í Þytsheimum á Hvammstanga, og verður að vera búið að skrá á miðnætti miðvikudaginn 22. febrúar. Skráning verður í gegnum skráningakerfi Sportfengs. Keppt verður í fjórgangi V5. 

Keppt verður í V5 í 1. flokki, 2. flokki, 3. flokki,  unglingaflokki og tvígangi í barnaflokki (T7 í Sportfeng). Pollar skrá sig einnig til leiks.

Slóðin inn á skráninguna er: Sportfengur og farið undir mót. Skráningargjaldið er 3.500 fyrir fullorðna, 2.000 fyrir unglinga og börn. Skráningargjöld verður að millifæra svo skráning sé tekin gild. Skráning í pollaflokk fer einnig fram í gegnum Sportfeng. Ef einhver skráir sig eftir að skráningu er lokið er skráningargjaldið 4.500 kr.

Skráningargjald skal greiða um leið og skráð er. kt: 550180-0499 Rnr: 0159-15-200343 Senda skal kvittun fyrir greiðslu skráningargjalds á netfangið thytur1@gmail.com

Næstu mót verða:

11. mars

25. mars

15. apríl ??

Knapamerki – 1,2 og 3 (aldurstakmark 12 ára)

Knapamerki 1

Bóklegir og verklegir tímar, sýnikennslur og heimaverkefni. Verklegir tímar verða bæði hóptímar og síðan sætisæfingar tveir og tveir saman.

Kennt verður á miðvikudögum og hefst kennsla 25. Janúar

Heildarkostnaður: 36.000 kr (próftökugjald innifalið)

Helstu markmið Knapamerki 1

• Að undirbúa hest rétt fyrir reið
• Geti teymt hestinn á múl eða beisli við hlið sér á feti og brokki/tölti
• Geti farið á og af baki beggja megin
• Kunni rétt taumhald og að stytta rétt í taumi
• Geti setið hest í lóðréttri (hlutlausri) ásetu á feti, tölti/brokki og hægu stökki
• Geti framkvæmt nokkrar sætisæfingar í hringtaum skv. stjórnun frá kennara
• Geti skipt á milli hlutlausrar ásetu, hálfléttrar og stígandi ásetu (1. stig stígandi ásetu)
• Kunni að skilja rétt við hest og búnað að reiðtíma loknum

Hesturinn þarf að kunna

• Að teymast við hlið (á feti og brokki og/eða tölti)
• Að standa kyrr þegar farið er á og af baki
• Að hringteymast (á feti og brokki)

Knapamerki 2

Bóklegir og verklegir tímar, sýnikennslur og heimaverkefni. Verklegir tímar verða bæði hóptímar, paratímar og einkatímar (prófæfingar).

Kennt verður á miðvikudögum og hefst kennslan 11. Janúar 2023.

Heildarkostnaður: 46.000 kr (próftökugjald innifalið)

Helstu markmið Knapamerki 2

• Geta látið hestinn kyssa ístöð á baki og við hönd, til beggja hliða
• Riðið einfaldar gangskiptingar
• Riðið helstu reiðleiðir á reiðvelli
• Geta riðið í hlutlausri lóðréttri ásetu, hálfléttri og stígandi ásetu
• Hafa gott jafnvægi á baki hestsins og nota rétt taumhald
• Látið hestinn stoppa, standa kyrran og ganga aftur af stað
• Geta riðið á slökum taum
• Sýna það í reiðmennsku og umgengni við hestinn að hann hafi tileinkað sér rétt viðhorf til hans

Hesturinn þarf að

• Geta staðið kyrr þegar farið er á og af baki
• Geta brokkað undir knapa
• Geta framkvæmt gangskiptingar upp í stökk á hringnum (20m þvermál)
• Geta sýnt hreint tölt
• Kunna að víkja

Knapamerki 3

Bóklegir og verklegir tímar, sýnikennslur og heimaverkefni. Verklegir tímar verða hópatímar, paratímar og einkatímar (prófæfingar).

Kennt verður á miðvikudögum og hefst kennslan 11. Janúar 2023.

Heildarkostnaður: 55.000 kr (próftökugjald innifalið)

Helstu markmið Knapamerki 3

• Að láta hestinn víkja um fram og afturhluta
• Knapinn hafi vald á lóðréttri ásetu, stígandi ásetu og hálfléttri ásetu
• Knapinn geti riðið gangskiptingar markvisst og af nákvæmni
• Knapinn geti riðið við slakan taum og langan taum
• Knapinn geti látið hestinn fara krossgang áfram og til hliðar á sama tíma
• Knapinn hafi gott vald á að nota reiðvöllinn rétt
• Knapinn hafi tileinkað sér rétt viðhorf gagnvart hestinum bæði í reiðmennsku og umgengni

Hesturinn þarf að

• Vera nokkuð sveigjanlegur til beggja hliða
• Geta sýnt stökk á hringnum (20m þvermál)
• Geta sýnt hreint tölt
• Kunna krossgang
• Kunna framfótasnúning

Fyrirhugaðar dagsetningar fyrir próf: Bóklegt 5.4. og verklegt 12.4. með fyrirvara um breytingar.

Þau námskeið sem ekki næst næg þáttaka í munu falla niður.

Skráning er tölvupóstfangið hanifeagnes@gmail.com fyrir 09.01.23. Við skráningu þarf að koma fram nafn og kennitala nemanda og símanúmer og hjá yngri knöpunum einnig nafn og kennitala foreldris. 

Hægt er að kaupa kort í höllina og verður það eins og undanfarin ár,  það gildir frá 1. nóv 2021 til 10. september 2022. 

Gjald Þytsfélaga er 25.000.- og má greiða inn á 0159-05-403351 kt. 550180-0499, annars fá korthafar sendan greiðsluseðil í vetur. 

Frekari upplýsingar hjá Ragnari í síma 869-1727 eða Tryggva í síma 660-5825.

Verðskrá vegna notkunar í Þytsheima er eftirfarandi: 
Kort fyrir meðlimi Þyts 25.000 kr
Kort fyrir aðra 30.000 kr
Dagpassi 2.000 kr
Einkatími-klukkutími milli 14.00 -16:00 og 19.00 - 24:00 5.000 kr
Einkatími-klukkutími milli 9-14 virka daga 3.000 kr
Einkatími-klukkutími um helgar 5.000 kr

Einnig er hægt að leigja, sal, eldhús og kaffiaðstöðu og hljóðkerfi og þarf að borga fyrir það aukalega.

Ekki er opið fyrir einkatíma á milli klukkan 16:00 - 19:00 á virkum dögum.

Uppskeruhátíð Þyts og Hrossaræktarsamtaka Vestur-Húnavatnssýslu var haldin laugardaginn 26 nóvember sl. Skemmtinefndin lét ekki sitt eftir liggja og sýndi leikin skemmtiatriði þar sem farið var yfir síðustu ár hjá Þytsfélögum. Af nógu var að taka því hlé hefur verið á hátíðarhöldum vegna covid takmarkanna. Patrekur Óli sá um matinn og bauð upp á lambalæri með öllu tilheyrandi og köku og kaffi í eftirrétt.  Óhætt er að segja að allir hafi skemmt sér vel, svo vel að Nína Sig dansaði meira að segja upp á sviði. 

Guðný Helga fór yfir árið hjá Hrossaræktarsamtökunum en 27 hross af svæðinu voru sýnd í fullnaðardóm á árinu og það voru 13 bú sem fóru með hross í dóm. Hæst dæmda hryssan eftir aldursleiðréttingu er Þrá frá Lækjamóti, 4 v hryssa ræktuð af Elínu Rannveigu Líndal og Þóri Ísólfssyni. Hæst dæmi stóðhesturinn eftir aldursleiðréttingu er Sindri frá Lækjamóti, 6 vetra. Ræktandi Guðmar Hólm Ísólfsson Líndal. 

Ný verðlaun á hátíðinni voru að veita hæst dæmda hrossi með 5 fyrir skeið viðurkenningu en það var Hátíð frá Efri-Fitjum, ræktandi Tryggvi Björnsson og Miðsitja ehf. 

Ræktunarbú ársins 2022 hjá Hrossaræktarsamtökum V-Hún er Lækjamót. Þau náðu þeim frábæra árangri á árinu að vera tilnefnd til hrossatæktarbús ársins á landsvísu og er það ekki sjálfgefið. 

Frá Lækjamóti komu til dóms 5 hross í ár, meðalaldur sýndra hrossa 5,8 ár. Meðaleinkunn sýndra hrossa var 8,25, 8,33 aldursleiðrétt. 

Til hamingju Lækjamótsfjölskylda, Þórir, Elín, Ísólfur, Vigdís, Guðmar, Sonja og Friðrik !!!

Pálmi formaður Þyts fór veitti knöpum ársins hjá Þyt sínar viðurkenningar, í barnaflokki voru þær jafnar Herdís Erla Elvarsdóttir og Ayanna Manúela Alves. Í unglingaflokki er knapi ársins Guðmar Hólm Ísólfsson Líndal, í ungmennaflokki er knapi ársins Eysteinn Tjörvi Kristinsson, í 2. flokki er knapi ársins Þorgeir Jóhannesson og í knapi ársins í 1. flokki er Helga Una Björnsdóttir. Allt frábærir knapar sem kepptu mikið á árinu með góðum árangri. 

Uppskeruhátíð barna og unglinga verður haldin föstudaginn 25. nóvember kl. 17 í félagsheimilinu Hvammstanga. 

Öll börn og unglingar sem hafa á einhvern hátt tekið þátt í æskulýðsstarfinu eru velkomin.

Veittar verða viðurkenningar og boðið upp á veitingar.

Hlökkum til að sjá ykkur. 

                                                                                Æskulýðsnefndin. 

Uppskeruhátíð Þyts og Hrossaræktarsamtaka V-Hún verður haldin laugardaginn 26. nóvember í félagheimilinu á Hvammstanga. 

Húsið opnar klukkan 18:30 og hátíðin byrjar klukkan 19:00 og stendur til klukkan 02:00 fyrir þá partýhörðustu.

Maturinn verður í höndum Patreks Óla sem mun án efa töfra fram dýrindis veislu.

Miðaverð á hátíðina er 9.000 kr.

Pantanir þurfa að berast eigi síðar en fyrir þriðjudaginn 22. nóvember

Gerður Rósa tekur á móti pöntunum í skilaboðum eða í síma 849-5396.

Keppendur eru beðnir að senda keppnisárangur ársins vegna knapaverðlauna á palmiri@ismennt.is 

Hestamannafélagið Þytur auglýsir eftir reiðkennurum fyrir veturinn 2023. Þeir sem hafa áhuga á að kenna unga fólkinu okkar er beðið um að hafa samb. við Pálma.

Einnig vantar okkur einhvern/einhverja til þess að starfa í veitinganefnd.

Til stendur að halda reiðhallarsýningu 29. apríl og þeir sem hafa áhuga á að vera í sýningarnefnd beðnir um að hafa samb. við Kollu Grétars.

Þytur óskar einnig eftir afnotum af hesti sem væri hægt að nota við hestafimleikana (eigandinn fengi þá hestinn hreyfðan x mörgum sinnum í viku til móts við eigandann, einnig tæki félagið þátt í að greiða uppihald á hestinum (þeir sem hafa áhuga hafi samb. við formann)

Stjórn Þyts

Ekkert verður af opna íþróttamóti Þyts þetta árið vegna dræmrar þátttöku, því miður er ekki næg þátttaka til að standa undir kostnaði en óvenju fáir hafa skráð sig til leiks.

Mótanefnd leggur til að mótið verði haldið í júní á næsta ári þar sem ekkert stórmót er á árinu 2023.

Þeir sem voru skráðir til leiks og búnir að borga skráningargjaldið mega senda tölvupóst á kolbrunindrida@gmail.com með reikningsupplýsingum svo hægt sé að endurgreiða skráningargjöldin.

Opna íþróttamót Þyts verður haldið á Kirkjuhvammsvelli dagana 20. - 21. ágúst nk. Skráningar skuli berast fyrir miðnætti miðvikudaginn 17. ágúst inn á skráningakerfi Sportfengs http://motafengur.skyrr.is/Skraningkort.aspx?mode=add
Mótanefnd áskilar sér rétt til að sameina flokka eða fella niður ef ekki næst næg þáttaka. Skráningargjöld í fullorðinsflokka og ungmennaflokk eru 4.000 kr. Fyrir börn og unglinga 2.500 kr. Í skeiði er skráningargjaldið 4.000 kr á hest. Þeir sem eru með farandbikara mega koma þeim til mótanefndar áður en mótið hefst.
Einnig vantar starfsfólk í allar stöður, þul, fótaskoðun, ritara hjá dómurum og í dómpalli. Ef einhver hefur tíma má hafa samband við Kollu í síma 863-7786, Fanney í síma 865-8174 eða senda skilaboð á messenger.

Greinar:
4-gangur V2 og tölt T3 1. flokkur
4-gangur V5 og tölt T7 2. flokkur
4-gangur V2 og tölt T3 ungmennaflokkur (18-21 árs á keppnisárinu)
4-gangur V2 og tölt T3 unglingaflokkur (14-17 ára á keppnisárinu)
4-gangur V5 og tölt T7 barnaflokkur (10-13 ára á keppnisárinu)
Pollaflokkur (9 ára og yngri á árinu) Verkefni: 3 til 5 keppendur inn á vellinum í einu. Þulur stjórnar keppni, riðið að lágmarki 3 hringir.
5-gangur 1.flokkur F2
Tölt T4 (einn flokkur)
gæðingaskeið
100 metra skeið

Þytsfélagar stóðu sig vel á landsmóti og voru félaginu til mikils sóma, verður að nefna fyrst ofurkonuna Helgu Unu Björnsdóttur en hún fékk reiðmennskuverðlaun FT en reiðmennskuverðlaun FT eru veitt á Lands- og Fjórðungsmótum. Verðlaunað er fyrir framúrskarandi reiðmennsku og framkomu með hesta sína, hvort sem er í keppnisgreinum eða á kynbótasýningum mótsins. Að öll framkoma sé til fyrirmyndar innan sem utan vallar, gagnvart hestum, starfsfólki og keppendum, ásamt því að hestar séu vel uppbyggðir og þjálfaðir.

Umsögn sem fylgdi verðlaununum er eftirfarandi:

„Helga sýndi 12 hross á mótinu í kynbótadómi, þar á meðal efstu hryssurnar í fimm og sex vetra flokkum, þær Hildi frá Fákshólum og Sögn frá Skipaskaga.

Hún tók einnig þátt í íþróttagreinunum með mjög góðum árangri og var meðal annars efst eftir forkeppni í fjórgangi á Hnokka frá Eylandi og reið Flugu frá Hrafnagili í B-úrslitum í tölti T1.

Reiðmennska Helgu einkennist af dirfsku og afköstum, en ekki síst af léttleika, sanngirni og skilningi. Allt lítur út fyrir að vera auðvelt, sjálfsagt og fyrirhafnarlítið fyrir knapann sem er gæðamerki reiðmennskunnar hjá Helgu.

Hestarnir hennar bera þess merki að hafa fengið góða uppbyggingu og vandaða þjálfun sem veldur því að þegar á brautina er komið leggja þau sig fram fyrir knapann sinn. Þau ganga í góðri líkamsbeitingu sem leiðir af sér fasmikla framgöngu án þvingunar.

Framkoma Helgu utan vallar er einnig til fyrirmyndar.

Helga, þú ert meðal okkar alfremstu! Það er unun að sjá þig á baki og í félagsskap hestanna þinna, hvort sem það er við upphitun eða í brautinni. Þú ert til fyrirmyndar! Til hamingju.”

Í unglingaflokki kepptu, Aðalbjörg Emma Maack, Guðmar Hólm Ísólfsson og Indriði Rökkvi Ragnarsson og stóðu þau sig öll með prýði. Guðmar og Jökull frá Efri-Rauðalæk komust í milliriðil og enduðu í 16. sæti með eink 8,48.

Í ungmennaflokki kepptu Eysteinn Tjörvi K. Kristinsson, Margrét Jóna Þrastardóttir og Rakel Gígja Ragnarsdóttir. Eysteinn og Rakel komust áfram í milliriðil og endaði Rakel Gígja og Trygglind frá Grafarkoti í 19. sæti með eink. 8,33 en Eysteinn reið sig í milliriðli beint í A úrslit og enduðu þeir í 7. sæti með eink 8,51

Í B flokki kepptu Hörður Óli Sæmundarson, Jóhann Magnússon og Jakob Svavar Sigurðsson og komst Jakob Svavar á Brynjari frá Syðri-Völlum í milliriðil og þaðan í B úrslit og endaði Brynjar frá Syðri Völlum í 10. sæti með eink 8,71. Knapi í úrslitum var Helga Una Björnsdóttir. 

í A flokki kepptu Hörður Óli á hrossunum Áfanga frá Víðidalstungu og Móa frá Gröf og Jóhann Magnússon á Rauðhettu frá Bessastöðum. Komumst ekki áfram í milliriðil en stóðu sig vel í feikna sterkum A flokki. 

Hér eru myndir sem Kolla Gr tók á mótinu og Eydís Ósk á úrtöku. 

Fulltrúar Þyts á landsmót 2022

Efstu þrír í hverjum flokki í úrtöku hafa unnið sér inn farmiða á landsmótið á Hellu í sumar og hér fyrir neðan má sjá hverjir hafa unnið sér rétt til þátttöku. 

Unglingaflokkur

1. Guðmar Hólm Ísólfsson Líndal og  Jökull frá Rauðalæk 8,51

2. Indriði Rökkvi Ragnarsson og Sátt frá Sveinatungu 8,35

3. Aðalbjörg Emma Maack og  Jara frá Árbæjarhjáleigu II  8,30

Varaknapi: Jólín Björk Kamp Kristinsdótti  og Kjarval frá Hjaltastaðahvammi 8,22

Ungmennaflokkur:

1 Eysteinn Tjörvi K. Kristinsson og Laukur frá Varmalæk  8,42

2 Rakel Gígja Ragnarsdóttir og Trygglind frá Grafarkoti 8,39

3 Margrét Jóna Þrastardóttir og Grámann frá Grafarkoti  8,19

B flokkur

1 Brynjar frá Syðri-Völlum og  Jakob Svavar Sigurðsson 8,72

2 Garri frá Bessastöðum og  Jóhann Magnússon 8,58

3 Eldur frá Bjarghúsum og Hörður Óli Sæmundarson 8,54

Varahestur: Snilld frá Efri-Fitjum og Tryggvi Björnsson 8,50

A flokkur

1 Áfangi frá Víðidalstungu II og Hörður Óli Sæmundarson 8,47

2 Mói frá Gröf og Hörður Óli Sæmundarson 8,37

3 Rauðhetta frá Bessastöðum og Jóhann Magnússon 8,32

Varahestur: Eldrós frá Þóreyjarnúpi og  Hörður Óli Sæmundarson 8,31

Félagið óskar eftir að fulltrúar taki þátt í hópreið á fimmtudeginum. 

Inn á landsmot.is eru upplýsingar fyrir knapa varðandi klár í keppni og hesthúsapláss.

Aðstaða fyrir keppnis og ferðahross

Vert er að geta þess að öll hross á svæðinu eru þar á ábyrgð eigenda sinna, sama hvað kann að koma upp á og ættu því hesteigendur að gera viðeigandi ráðstafanir samkvæmt því. Ekki er reiknað með að keppendur fái hesthúspláss á staðnum. Ekki er hægt að taka við hestaferðahópum á mótsstað.

Grænasvæðið / Knapasvæði

Græna svæði knapa er áætlað í og við Rangárhöllina. Þar hafa knapar aðstöðu til upphitunnar innandyra og einnig er þeirra einka veitingahús í anddyri hallarinnar. Þar verða starfsmenn mótsins í mat og gert er ráð fyrir knapastofu í helming salarins.

Ekki er gert ráð fyrir að hinn almenni mótsgestur eigi aðgang að knapasvæði.